Նելլի Դուրյանը պատասխանում է Զարուհի Բաթոյանին

Մայիսի 6-ին ոստիկանության հասարակայնության հետ կապի և լրատվության վարչության ասուլիսների սրահում տեղի ունեցավ ոստիկանության քրեական հետախուզության գլխավոր վարչության 3-րդ վարչության պետ, ոստիկանության գնդապետ Նելլի Դուրյանի հանդիպումը լրագրողների հետ:

Նելլի Դուրյանը ներկայացրեց 2019 թվականի առաջին եռամսյակում անչափահասների կողմից կատարված հանցագործությունների վիճակագրությունը։ Անցած տարվա նույն ժամանակահատվածի համեմատությամբ՝ արձանգրված հանցագործությունները պակասել են 4-ով՝ նախորդ տարվա 66 հանցագործության փոխարեն այս տարի արձանագրվել է 62-ը։ 3-ով պակասել են անչափահասի կողմից մարմնական վնասվածք հասցնելու, ավելացել են գողության և խուլիգանության դեպքերը։ Անչափահասի կողմից ավտոմեքենա փախցնելու դեպքերի ցուցանիշներում այս տարի նույնպես անկում է գրանցվել։

Նախորդ տարվա համեմատությամբ, այս տարի նվազել են նաև անչափահասների նկատմամբ բռնության բոլոր դրսևորումների դեպքերը։

Ոստիկանության գնդապետը ներկայացրեց նաև անչափահասների շրջանում պահվող սառը զենքեր հայտնաբերելու տվյալները։ Ոստիկանության պետի հանձնարարությամբ՝ այս խնդիրը ոլորտը սպասարկող ոստիկանների հատուկ ուշադրության կենտրոնում է։ Այս տարվա առաջին եռամսյակում, ոստիկանների ամենօրյա շրջայցերի և ստուգայցերի արդյունքում, անչափահասների մոտ հայտնաբերվել է 41 արգելված առարկա, որից 18-ը կռփազենք էր։
Նելլի Դուրյանը ներկայացրեց նաև մուրացիկ երեխաների հետ տարվող և ընտանիքում բռնության կանխարգելման ոլորտում կատարված աշխատանքները։ 

Անդրադառնալով Զարուհի Բաթոյանի դիտարկումերին ոստիկանության գնդապետ Նելլի Դուրյանը ասաց, որ տեղյակ չէ թե որտեղից է նախարարը վերցրել այդ տեղեկատվությունը, և որ նա ներկայացնում է ոստիկանության պաշտոնական տվյալները: Նելլի Դուրյանը ներկայացրեց վերջին չորս տարվա վիճակագրությունը և հայտնեց, որ 2016 թվականի ընթացքում անչափահասների նկատմամբ սեռական ազատության և սեռական անձեռնմխելիության դեմ ուղղված հանցագործությունների թիվը եղել է 80 դեպք, 2017 թվականի ընթացքում` 71 դեպք, 2018 թվականի ընթացքում 50 դեպք: 2018 թվականի առաջին երեք ամիսների ընթացքում եղել է այդպիսի 19 դեպք, իսկ 2019 թվականի ընթացքում 14 դեպք, այսինքն հինգ դեպքի նվազում է եղել և տարիների ընթացքում դեպքերի նվազում ունենք:

Նշենք, որ պաշտոնավարման 100 օրն ամփոփող ասուլիսում հայտարարեց աշխատանքի և սոցիալական հարցերի նախարար Զարուհի Բաթոյանը տեղեկություն էր հայտնել,որ 2017 թվականին քննված սեռական բնույթի 161 հանցագործություններից 101-ը երեխաների նկատմամբ է եղել