Գյումրիում գործող մինի նվագարանների թանգարանն առաջիկայում համալրվելու է նոր ցուցանմուշներով (լուսանկարներ)

Գյումրիում  գործում է մինի թանգարան, որի ցուցանմուշների 90 տոկոսը պատրաստված է թղթից և 80-100 անգամ փոքր է իրական չափերից:  Արդեն  երեք  ամիս գործող թանգարանը այցելուների պակաս  չունի,  հիմնականում զբոսաշրջիկներ են, իսկ առաջիկայում թանգարանը կավելացնի իր  ցուցանմուշների թիվը:

Թանգարանի ցուցանմուշները հիմնականում նվագարաններ են: Թանգարանի տնօրեն ու գործերի հեղինակ Վալերի Նազարեթյանն իրերը պատրաստելու համար օգտագործում է տարբեր տեսակի թղթեր: Նա լրագրողի հետ զրույցում անկեղծանում է՝ նորը ստեղծելու սերը փոքր հասակից է ունեցել, երբ նվեր ստացած խաղալիքները քանդել ու փորձել է յուրովի հավաքել, հետո արդեն ավելի բարձր դասարաններում ստեղծել է եկեղեցիների ու մեքենաների մանրակերտներ: Ավելի ուշ իր համար պատրաստել է նաև հատուկ գործիքներ՝ իսպանական «Բարսելոնա» կիթառը, Weltmeister ակորդեոնը, հարվածային գործիքները և մյուս իրերը պատրաստելու համար:

«Թանգարանը, ճիշտ է, փոքր է, բայց ցուցանմուշները՝ գերող: Չնայած կարճ ժամանակահատվածին, արդեն բավականին շատ այցելուներ ունեցել է՝ հիմնականում զբոսաշրջիկներ Երևանից. մարդիկ, իմանալով թղթե փոքր իրերի մասին, գալիս են անձամբ տեսնելու»,-նշում է Վալերի Նազարեթյանը՝ խոստանալով, որ առաջիկայում անակնկալներ կլինեն նոր՝ մյուսներից տարբերվող ցուցանմուշների տեսքով:

Թանգարանի ամենափոքր ցուցանմուշը, որը հազիվ կարելի է նշմարել մարդու ափի մեջ, դուդուկն է՝ պատրաստված է ծիրանի ճյուղից, իսկ կրկնակի լեզվակը (ղամիշ)՝ ցորենի հասկից: Դուդուկը ևս իրական է՝ ձայն ստանալը հնարավոր է, եթե լինի օդամղիչ: Միակ առանձնահատկությունն այն է, որ ի տարբերություն իրականի՝ այս դուդուկի համար պատյան է պատրաստվել կրկին թղթից:

Մինչ  թանգարանի բացումը հեղինակն իր գործերը ցուցադրել է Երևանում, բայց, տուրիզմի մասնագետ լինելով, մտածել է, որ ավելի լավ է Գյումրիում մշտական ցուցադրություն ունենալ՝ զարգացնելով նաև  տուրիզմը: