Ճապոնական «ՋԱՅԿԱ» ընկերությունը ՀՀ-ին է տրամադրել 40 հրշեջ փրկարարական եւ 10 ամենագնաց մեքենաներ (տեսանյութ)

Տեսանյութեր 6 Մայիս, 2019 21:30

Մայիսի 6-ին Արտակարգ իրավիճակների նախարարության շարահրապարակում տեղի ունեցավ 14 հրշեջ ավտոմեքենայի, 3 ավտոսանդուղքի և 1 կարգավար մեքենայի՝ ԱԻ նախարարությանը հանձնման հանդիսավոր արարողությունը: Միջոցառմանը ներկա էին ՀՀ վարչապետ Նիկոլ Փաշինյանը, ԱԻ նախարար Ֆելիքս Ցոլակյանը, ԱԱԾ տնօրեն Արթուր Վանեցյանը, ԱԱԽ քարտուղար Արմեն Գրիգորյանը, ՀՀ Տրանսպորտի, կապի և տեղեկատվական տեխնոլոգիաների նախարար Հակոբ Արշակյանը, ՏԿ նախարար Սուրեն Պապիկյանը, ոստիկանապետ Վալերի Օսիպյանը, ՀՀ-ում Ճապոնիայի արտակարգ և լիազոր դեսպան Ջուն Յամադան, Ճապոնիայի միջազգային համագործակցության գործակալության ներկայացուցիչ Հեջուրի Յուկիյոն և այլ բարձրաստիճան պաշտոնյաներ:

Միջոցառումը մեկնարկեց Հայաստանի և Ճապոնիայի ազգային օրհներգների հնչեցմամբ:

Ողջունելով ներկաներին, Ֆելիքս Ցոլակյանը նշեց, որ ընդամենը մի քանի ամիս անց՝ սեպտեմբերի 7-ին, կլրանա հայ-ճապոնական դիվանագիտական հարաբերությունների հաստատման 27-րդ տարին, սակայն հայ և ճապոնացի ժողովուրդների բարեկամությունը դիվանագիտական հարաբերությունների տարիներով չի պայմանավորված միայն և բնավ դրանցով չի սահմանափակվում:

«Անհնար է մոռանալ դեռևս 1988թ.-ին՝ Սպիտակի աղետալի երկրաշարժի օրերին, ճապոնական կողմից հայ ժողովրդին մեկնված օգնության ձեռքը: Այդ օրերին Ճապոնիայի Մուսաշինո, Մացույամա, Օգավա, Ակիտա և մի շարք այլ քաղաքների Կարմիր Խաչի հիվանդանոցներից ընդհուպ մինչև 6 ամսով աղետի գոտի էին գործուղվել տասնյակ բուժաշխատողներ, փոխանցվել են մի քանի միլիոն իենի հասնող արյան տոպրակներ, ներարկիչներ, հակաբիոտիկներ, դեղորայք»,- նշեց Ֆելիքս Ցոլակյանը:

Նախարար Ֆելիքս Ցոլակյանը նշեց, որ Հայաստանը և Ճապոնիան արտակարգ իրավիճակների ոլորտում առկա մարտահրավերների առումով շատ նման են: «Իրականացնելով բացառապես հումանիտար առաքելություն՝ փրկարարն իր ամենօրյա քրտնաջան աշխատանքով փրկում է հազարավոր կյանքեր»,- ասաց Ֆելիքս Ցոլակյանը:

Նախարարը շեշտեց, որ այսօրվա միջոցառումը խորհրդանշում է երկու երկրների բարեկամությունն ու ընկերությունը:

Վարչապետ Նիկոլ Փաշինյանն իր խոսքում հայ ժողովրդի անունից երախտագիտություն հայտնելով բարեկամ Ճապոնիայի ժողովրդին՝ ընդգծեց Հայաստանին աջակցության հարցում Ճապոնիայի ներդրած ավանդը:

«Ձեր օգնությունը մշտապես օգնել է Հայաստանի զարգացման ծրագրերի իրականացման, տնտեսության և ենթակառուցվածքների արդիականացման հարցում: Հարկ է նկատել, որ ճապոնական օգնությունը հատկապես զգալի է եղել բնական աղետներից պաշտպանության մեր ունակությունների բարձրացման ոլորտում: Դա վերաբերում է սողանքների դեմ պայքարին, սեյսմիկ կայունությանը, հրշեջ ծառայությունների ունակությունների արդիականացմանը և այլ հարցերի»,- նշեց Նիկոլ Փաշինյանը:

ՀՀ-ում Ճապոնիայի դեսպան Ջուն Յամադան հայերեն հնչեցված իր ելույթում անդրադարձավ տրամադրվող տեխնիկայի Հայաստանի համար անհրաժեշտության հարցին:

«Սա իսկապես նշանակալի ծրագիր է, որն ուղղված է Հայաստանում աղետների կանխարգելմանը, առաջնային շրջաններ հանդիսացող Շիրակի, Լոռու և Սյունիքի մարզերի փրկարար ստորաբաժանումների տեխնիկական հագեցմանը: Հայաստանում հաճախակի են տեղի ունենում բնական աղետներ, որոնք խոչընդոտ են հանդիսանում գյուղական բնակավայրերի զարգացմանը: Այդ պատճառով Ճապոնիան առաջնահերթ է համարում աջակցել Հայաստանին հենց աղետների կանխարգելման բնագավառում»,- նշեց Ջուն Յամադան:

Միջոցառման պաշտոնական հատվածից հետո վարչապետ Նիկոլ Փաշինյանը, նախարար Ֆելիքս Ցոլակյանը, դեսպան Ջուն Յամադան և այլ պաշտոնատար անձինք շրջայց կատարեցին շարահրապարակի տարածքում, ծանոթացան տրամադրված տեխնիկային և օժանդակ սարքավորումներին, որին հաջորդեց փրկարարների կողմից սանդուղքների օգտագործմամբ պայմանական հրդեհաշիջումը:

Միջոցառման ավարտին տեղի ունեցավ ԱԻՆ-JICA երկարատև և արդյունավետ համագործակցությունը խորհրդանշող նամականիշի մարում:

Արտակարգ իրավիճակների նախարարության և Ճապոնիայի կառավարության տարբեր գործակալությունների միջև ծավալվում է բեղուն և ակտիվ համագործակցություն: Այս համագործակցության կարևոր հանգրվաններից մեկն արձանագրվեց 2017թ. սեպտեմբերի 7-ին, երբ Արտակարգ իրավիճակների նախարարության և Ճապոնիայի միջազգային համագործակցության գործակալության (JICA) միջև ստորագրվեց 36 հրշեջ մեքենա, 3 ավտոսանդուղք և 1 կարգավար մեքենա տրամադրելու մասին դրամաշնորհային համաձայնագիր: Ծրագրի ընդհանուր արժողությունն է ավելի քան 14 մլն ԱՄՆ դոլար:

Ծրագրով նախատեսված տեխնիկայի երկրորդ խմբաքանակը (22 հրշեջ մեքենա) պլանավորվում է տրամադրել այս տարվա սեպտեմբեր-հոկտեմբեր ամիսներին:

Ստացված տեխնիկայի շնորհիվ կվերազինվեն Սյունիքի, Լոռու և Շիրակի մարզերի փրկարարական ծառայությունները: