Խայտառակ հաստիքացուցակ, բոյկոտ, ամենաթողություն. ի՞նչ է կատարվում Երևանի քաղաքապետարանում

Այսօր ժամը ութին Երևանի քաղաքապետարանում պետք է տեղի ունենար ֆինանսավարկային հանձնաժողովի նիստ, որտեղ պետք է քննարկվեր քաղաքապետ Հայկ Մարությանի բերած բյուջեի նախագծի փոփոխության ու հաստիքացուցակի հարցը: Սակայն «Իմ քայլը» խմբակցության ավագանու անդամների բոյկոտի արդյունքում նիստը տեղի չի ունեցել։

Տեղի ունեցածի մանրամասների մասին ԼՈՒՐԵՐ.com-ը զրուցեց ավագանու «Լույս» խմբակցության անդամ Թեհմինա Վարդանյանի հետ, ով նշեց, որ ժամը 20։00-ին «Լույս» և «ԲՀԿ» խմբակցությունների ավագանու անդամները եղել են նիստերի դահլիճի մոտ, որտեղ քաղաքապետն իր ֆրակցիայի հետ ժողով-քննարկում էր անցկացնում։

«Տասը րոպե անց մեկ-երկու ավագանու անդամներ դուրս եկան, ասացին՝ կներեք, հեսա կավարտենք, սպասեք և այլն, դա էլ նորմալ չէր, բայց մենք շարունակեցինք սպասել։ Մի քանի անգամ ներս ու դուրս արեցին և ասացին, որ հանձնաժողովի նիստը տեղի չի ունենալու, որովհետև իրենք ներսում քննարկում են անում։ Այսինքն, քաղաքապետարանը որոշ չինովնիկների համար դարձել է իրենց «հոր դուքյանը»։ Այլ մեկնաբանություն չեմ կարող տալ, քան ժողովուրդի լեզվով ասած՝ «հոր դուքյանը»,- մանրամասնեց Վարդանյանը։

Ավագանու անդամը նշեց, որ նիստերի դահլիճի մոտ վեճ է սկսվել, որի ընթացքում ավագանու իմքայլական մի քանի անդամներ գռեհիկ պահվածք են ցուցաբերել։

«Այդտեղ վեճ սկսվեց, մենք մեր բան ու գործը թողած, երեկոյան 8-ին գնում ենք նշանակված նիստին, սպասում ենք կես ժամ ու դրանից հետո իրենց քմահաճույքով նիստը տեղի չի ունենում։ Այդ ժամանակ մենք հարցրինք՝ դուք բոյկոտո՞ւմ եք, ասացին՝ այո՛, համարեք, որ բոյկոտում ենք։ Ըստ էության, «Իմ քայլը» խմբակցության ավագանին այսօր բոյկոտեց իր քաղաքապետի կողմից բերված նախագիծը։ Այնտեղ վիճաբանություն տեղի ունեցավ, շատ գռեհիկ պահվածքով իրենց դրսևորեցին «Իմ քայլի» որոշ անդամներ։ Առհասարակ, իրենք պետք է քննարկեն և հասկանան, թե ինչ է կատարվում քաղաքապետարանում, քանի որ օր օրի մթնոլորտն ավելի է վատանում։ Սա ամենաթողություն է, որը օր օրի ավելի է խորանում։ Ես չգիտեմ, թե էսպես քաղաքային իշխանությունը, քաղաքապետի գլխավորությամբ, մինչև ուր է հասնելու։ Քաղաքապետը տեղից չշարժվեց այն պարագայում, երբ իրենց ավագանու անդամներից մեկը արդեն ձեռքերով հասնում էր տիկին Խաչատրյանին։ Քաղաքապետը անգամ հոնքը չշարժեց, չպտտվեց, չփորձեց հասկանալ՝ ինչ է կատարվում այդտեղ։

Հարցին, թե ըստ ավագանու անդամի, ո՞րն է բոյկոտի պատճառը, Վարդանյանը պաասխանեց․

«Մարդիկ ֆրակցիայի նիստ էին անում ու, երևի թե, հարկ չհամարեցին ներկա լինել հանձնաժողովի նիստին։ Երևի իրենց մոտ քննարկումները շատ թեժ են հաստիքացուցակի հետ կապված, որը ուղղակի խայտառակություն է։ Բարձրացնել բարձրաստիճան չինովնիկների աշխատավարձերը, ընդ որում՝ հայեցողական պաշտոնների։ Բարձրացնել վարչական շրջանի ղեկավարի տեղակալի աշխատավարձը, որն ավելի բարձր է, քան մի ամբողջ մարզի մարզպետի աշխատավարձը։ Դա առնվազն աննորմալ է։ Ինչ վերաբերում է աշխատավարձերի բարձրացմանը՝ մենք ամենևին էլ դեմ չենք, բայց եթե քաղաքապետարանի  միջին օղակների աշխատավարձը բարձանում է 25-30 տոկոսով, իսկ նոր նշանակված փոխքաղաքապետեր, վարչական շրջանների ղեկավարներ, նրանց տեղակալներ ստանան ահռելի գումարներ մեր ոչ ճկուն բյուջեից՝ աննորմալ է»։

Վարդանյանի կարծիքով «Իմ քայլը» խմբակցությունում ևս դժգոհություններ են առաջացել։

«Իրենք էլ չգիտեն, թե ինչ անեն իրենց իսկ բերած քաղաքապետի հետ։ Կարծում եմ՝ տարաձայնություններ կան, այնուամենայնիվ, մայիսի 8-ի արտահերթ նիստը կտա բոլոր պատասխանները»,- եզրափակեց Վարդանյանը։