Մարդկանց դժգոհությունները դեռ կապված են նախորդ շրջանի հետ. ԲՀԿ-ական պատգամավոր

Չենք կարող հերքել, որ նոր կառավարության կողմից շատ բաներ արվել են:

Այս մասին Ազգային ժողովում ասաց ԱԺ «Բարգավաճ Հայաստան» խմբակցության պատգամավոր Միքայել Մելքումյանը` անդրադառնալով նոր Հայաստանի մասին` վարչապետ Նիկոլ Փաշինյանի հայտարարած 100 փաստերին:

Նրա խոսքով, սակայն, ձախողվել են շինարարությունների թույլտվությունները, ներդրումներ չկան, ինչ էլ հնարավոր է եղել ստվերից հանել՝ մի պահ գալու է, որ այդ աճը դանդաղելու է. «Առաջին եռամսյակում ունենք առևտրաշրջանառության 15% անկում և արտահանման 9% անկում»,- ասաց Միքայել Մելքումյանը: Անդրադառնալով նրան, թե իշխանությունների դեմ սպասվող պայքարում հնարավո՞ր է՝ կարողանան մարդկանց փողոց դուրս բերելով, մարտահրավեր նետել, Մելքումյանն ասաց.

«ԲՀԿ-ն միշտ հայտարարել է, որ այն սպասումները և ակնկալիքները, որ կան հետհեղափոխական շրջանում, դրանց իրականացմանը միայն աջակցելու ենք: Ես կարծում եմ, որ չի բյուրեղացել այն պահը, որը հանգեցնի հակահեղափոխական նման փուլի: Ճիշտ է, շատերը դժգոհ են, բնական է՝ աշխատանք չկա, բայց մարդկանց դժգոհությունները դեռ կապված են նախորդ շրջանի հետ: Թե ինչ կլինի` կյանքն է ցույց տալիս՝ կախված է նաև նրանից, թե այս իշխանություններն իրենց գործունեությունն ինչպես կշարունակեն»,-ասաց Միքայել Մելքումյանը:

ԼՈւՐԵՐ.com-ի հարցին, թե համամի՞տ է վարչապետի այն հայտարարությանը, որ Հայաստանում քաղբանտարկյալներ չկան, Միքայել Մելքումյանը պատասխանեց. «Ես կարծում եմ, որ չկան մեզ մոտ քաղբանտարկյալներ: Այն բոլոր բանտարկյալները, որոնք կարող են հասարակության կողմից ակնկալվել քաղբանտարկյալներ, նրանց բոլորի հարցը քննարկվում է զուտ իրավական հարթության վրա»: