«Իմ մարմինն անձնական է» գրքում ոչ մի արտառոց բան չկա. Փաշինյան

«Ես մասնագետ չեմ, կարող եմ սխալվել, բայց երբ կարդացի «Իմ մարմինն անձնական է» գիրքը, տեսա, որ ոչ մի արտառոց բան չկա»,- այս մասին այսօր մամուլի ասուլիսի ժամանակ հայտարարեց վարչապետ Նիկոլ Փաշինյանը:

«Ես այդ գիրքը վերցրի, որպեսզի կարդամ և հասկանամ՝ սարսափելի բան կա՞, թե՞ ոչ: Այն երեխային բացատրում էր, որ մարմնի անձնական մասեր գոյություն ունեն, ասում էր, որ երբ մայրիկը, հայրիկը համբուրում են, դա նորմալ է և ասում էր, որ լինում են դեպքեր, երբ օտարներ կամ քեռիներ են համբուրում, և դա այդքան էլ հաճելի չէ: Ես իմ երեխայի օրինակով գիտեմ, լինում են դեպքեր, երբ այլ մարդիկ համբուրում են իրեն, և այդքան էլ հաճելի չէ, ես զգում եմ դա, տեսնում եմ: Գիրքը երեխային բացատրում է այս ամենը»,- նշեց Նիկոլ Փաշինյանը:

«Եթե չեմ սխալվում՝ 2017-ին ՀՀ-ում մանկապղծության 71 դեպք է տեղի ունեցել: Հայաստանում տարեկան միջինը 50, 60, 70 մանկապղծության դեպք է գրանցվում:

Դրանք ենթադրաբար տեղի են ունենում նաև այն պատճառով, որ երեխաները շատ դեպքերում չեն հասկանում՝ իրենց հետ ինչ է տեղի ունենում: Մանկապղծության դեպքերը տեղի են ունենում, երբ երեխային ներքաշում են, երեխան ինտուիտիվ ինչ-որ բան հասկանում է, բայց չգիտի՝ դա նորմա՞լ է, թե՞ նորմալ չէ: Գրքում երեխային ասում է՝ երբ որ դու հայտնվես նման իրավիճակում, երբ քո մարմնի անձնական համարվող մասերին օտար մարդը փորձի դիպչել, դու իրեն կարող ես ասել՝ ոչ, չի կարելի դիպչել»,- ասաց նա:

Ինչ վերաբերում է գրքի միջոցով այլասերվածություն տարածելու վերաբերյալ քննադատություններին, վարչապետը նշեց. «Մեր երեխաներն ի վերջո հասուն տարիքի են հասնում և հասուն կյանք են մտնում, իրենք որտեղի՞ց են իմանում այդ ամեն ինչի մասին, փողոցի՞ց, իրարից լսելո՞վ, ինտերնետում իրենց տարիքի համար չնախատեսված ֆիլմեր դիտելո՞վ, կներեք, պոռնո կայքերից թաքուն օգտվելո՞վ: Սա մեզ չի՞ մտահոգում»: 

Նիկոլ Փաշինյանը հայտարարեց, որ պատրաստ է լսել բոլոր այն մարդկանց, ովքեր ասում են՝ գիրքը այլասերվածություն է տարածում. «Եթե այլասերվածություն է, եկեք արմատախիլ անենք, բայց եկեք հասկանանք էլի, թե դա ինչ է»,-նշեց նա: