Չեմ կարծում, որ եղել է այնպիսի մի ժամանակաշրջան, որ զինվորը մայկա-տռուսիկ չունենար. Էդմոն Մարուքյան

«Այն, որ այս օրերին դժվար է բանակից փողով կամ այլ ձևերով ազատվելը, դրանում վստահ եմ»: Այս մասին այսօր՝ մայիսի 9-ին, Եռաբլուրում լրագրողների հետ զրույցում ասաց «Լուսավոր Հայաստան» խմբակցության ղեկավար Էդմոն Մարուքյանն, անդրադառնալով այն հարցին, թե իշխանափոխությունից հետո ինչ է փոխվել նբանակում: 

«Բանակի ներքին կառուցվածքը, որ ասենք այսքան շուտ փոխվել է՝ վաղ դատողություն կլինի»,-նշեց Մարուքյանը:

Հարցին, թե կարելի՞ է համարել, որ ինչպես վարչապետը երեկ մամուլի ասուլիսում ասաց՝ անցյալում մնաց այն դրվագը, որ զինվորը մայկա-տռուսիկ չուներ, իսկ իշխանությունները միլիոնատերեր էին, Մարուքյանը պատասխանեց. «Ես չեմ կարծում, որ եղել է այնպիսի մի ժամանակաշրջան, որ զինվորը մայկա-տռուսիկ չունենար: Կարծում եմ՝ վարչապետը փոխաբերական իմաստով է ասել»:  

Դիտարկմանը, թե ծնողներն են ուղարկում, Մարուքյանն ասաց. «Ծնողը միշտ էլ ուղարկում է ու միշտ էլ ուղարկելու է և չենք կարող արգելել»:

Հարցին, թե երեկ վարչապետը հայտարարեց, որ զինվորներն իրավունք ունեն հեռախոս ունենալու, ի՞նչ է կարծում անվտանգության առումով սա խոցելի փաստ չէ՞, Մարուքյանն ասաց. «Որքանով գիտեմ, դա դիրքերում չի գործում, խոսքը զորամասերի մասին է: Եթե խոսեն առողջության մասին կամ ծնունդ շնորհավորեն, կարծում եմ՝ այստեղ անվտանգության խնդիր չկա: Եթե պատմեն ուր են գնացել զորավարժությունների, այդտեղ արդեն կունենանք խնդիր»: