Եթե դարպասապահը գոլ չխփի՝ չենք վարձատրելո՞ւ

Երեկ՝ մայիսի 8-ին ՀՀ վարչապետ Նիկոլ Փաշինյանը մամուլի ասուլիսի ընթացքում ներկայացրեց նոր կառավարության արձանագրած100 հաջողությունները, պատասխանեց լրագրողների հարցերին։ Վարչապետի ներկայացրած 100 փաստերը, սակայն, ոչ միանշանակ ընդունվեցին։ Փաշինյանի ներկայացրած փաստերի և վարչապետության մեկ տարվա մասին ԼՈՒՐԵՐ.com-ը զրուցեց «Լուսավոր Հայաստան» խմբակցության պատգամավոր Սարգիս Ալեքսանյանի հետ։

-Վարչապետի ներկայացրած 100 փաստերից մեկն այն է, որ իր ընտանիքը կրում է միայն հայկական արտադրության հագուստ, ըստ Ձեզ՝ սա կառավարության հաջողություններից մե՞կն է։

-Այն, որ վարչապետի մակարդակով խրախուսվում է հայկական արտադրանքը, շատ գովելի է, բայց իր կառավարման ժամանակահատվածում հայկական արտադրանքը դեռևս բավարար աճ չի գրանցել, եթե այդ գովազդի արդյունքում ավելացել է հայկական արտադրության հագուստի վաճառքը և թուրքական կամ չինականը նահանջ է գրանցել, ապա դա ողջունում եմ:

-Մեկ այլ փաստով նշվում է, որ ոստիկանական համակարգում փոփոխություններ են արվել և ոստիկանի աշխատանքից է կախված նրա աշխատավարձը. որքան շատ հանցագործություն բացահայտվի, այնքան աշխատավարձը կլինի բարձր։ Չկա՞ ռիսկ, որ մենք կվերադառնանք այն համակարգին, երբ ոստիկանները ստիպում են սխալ ցուցմունք տալ։

-Մեր քաղաքացիներն ունեն անօրինություններից պաշտպանվելու հնարավորություն, եթե բռնության են ենթարկվում, կարող են դրա համար դիմել մարդու իրավունքների պաշտպանին և շատ այլ միջոցներով իրենց իրավունքներին տեր կանգնել, իսկ օրենք խախտող ոստիկանները տեղ չունեն համակարգում և պետք է նմաններին վռնդել և պատասխանատվության ենթարկել օրենքով: Ոստիկանական ստորաբաժանումներից ոչ բոլորն են հանցագործություն բացահայտում, օրինակ՝ պահպանությունը: Այստեղ կա տարբերակված մոտեցում. չի կարող սա արդար համարվել: Կարող եմ վառ օրինակով համեմատություն անել՝ ֆուտբոլային թիմում կան և՛ հարձակվող, և՛ դարպասապահ, ասենք, եթե դարպասապահը գոլ չխփի՝ չենք վարձատրելո՞ւ։ Վերջերս Տավուշում էի և մարդիկ բողոքում էին, որ Այրում խոշորացված համայնքում շատացել են հանցագործությունները՝ թալանվել են խանութներ և դեղատներ, իսկ բացահայտումներ դեռևս չեն եղել, ստիպված սեփականատերերը գիշերներն իրենք են հսկողություն իրականացնում:

-Կա՞ն խոստումներ, որոնք այս մեկ տարվա մեջ չեն իրականացել։

-Խոստումների չկատարումներից՝ անցումային արդարադատության հետ կապված դեռև ոչինչ չի արվել, մարդկանց ապրելակերպը չի լավացել, հակառակը՝ թանկացումներ են տեղի ունենում շատ ապրանքատեսակների և ծառայությունների մասով և այլն։

Ասպրամ Փարսադանյան