Կեղծ օրակարգ է. ակտիվիստները պառակտման և բաժանարար գծեր ստեղծելու միտում են հետապնդում. Թագուհի Ղազարյան

Վերջին շրջանում բուռն քննարկումների պատճառ է դարձել «Իմ մարմինն անձնական է» գրքի շնորհանդեսը և ակտիվիստների կողմից դրա տապալումը: Մայիսի 7-ին՝ Աժ հերթական նիստում, իր ելույթի ընթացքում «Իմ քայլը» խմբակցության պատգամավոր Թագուհի Ղազարյանն անդրադարձել էր տեղի ունեցածին, դատապարտել ակտիվիստների քայլը: Պատգամավորը նշել էր, որ Հայաստանում չկա և չի կարող լինել գրաքննություն։ ԼՈՒՐԵՐ.com-ի հետ զրույցում Ղազարյանն ասաց, որ չի խոսել գրքի բովանդակությունից, այլ պաշտպանում է ՀՀ-ում ցանկացած գրքի կամ տեքստի գոյության իրավունքը։

«Ես վստահ եմ, որ գրաքննությունը բռնապետական երկրի առաջին ցուցանիշն է։ Շատ տեքստեր կան Հայաստանում, որ ինձ ընդհանրապես դուր չեն գալիս. սկսած ստատուսներից, վերջացրած լրատվական դաշտով, եթերով և, եթե գրաքննություն լինի՝ առաջինը կանդրադառնա դրանց վրա, որի դեմ ես կրկին կըմբոստանամ։ Չնայած նրան, որ սլաքներն ուղղում են դեպի ինձ, դեպի մեր գործընկերները, ամեն դեպքում, ես կարծում եմ, որ կարծիքն ու միտքը, քանի դեռ  չեն դարձել հակասահմանադրական, իրավունք ունեն գոյություն ունենալ»,-նշեց իմքայլական պատգամավորը:

Ինչ վերաբերում է հայ հասարակության ներսում սեռական դաստիարակության անհրաժեշտությանը, պատգամավորը կածում է, թե խուսափելով խնդրի հետ առերեսվելուց, լուծումներ այդպես էլ չեն տրվի, և, եթե անգամ մեր հասարակությունն այդ խնդրի կրողը չէ, ամեն դեպքում, զգայուն է դրա հանադեպ։ Չպետք է ատելություն սերմանել, այլ գտնել ճանապարհը, որպեսզի հնարավորինս նվազեցվի նման ճակատագրերով մարդկանց թիվը.

«Եթե կան մարդիկ, ովքեր ունեն ավելի հետաքրքիր, նրբանկատ մոտեցումներ, ապա պետք է գտնենք դրանք, քանի որ այս ամենը իսկապես խնդիր է այսօր»,- ասաց նա։ 

Թագուհի Ղազարյանը խնդիր է տեսնում նաև տեղեկացվածության հարցում, քանի որ հրապարակ եկած անանուն պատմությունները խոսում են այն մասին, որ հասարակության մեջ կա նման խնդիր և դաստիարակության անհրաժեշտություն։

Նրա խոսքով՝ անհրաժեշտություն կա երկխոսելու։ Չնայած՝ կան մարդիկ, ովքեր արդեն ուղղորդված են, կամ էլ չգիտեն, թե որն է ճիշտ, որն է սխալ. «Դրա համար մենք պետք է երկարաժամկետ երկխոսութուն սկսենք և հասկանանք, թե մեզ համար որն է կարևոր։ Կարևոր է նաև, որ ծնողները  կարողանան այնպիսի միջավայր ստեղծել, որ երեխանները բոլոր խնդրահարույց հարցերով կարողանան կիսվել ծնողների հետ։ Մեր մանկության տարիներին էլ մենք շատ հարցերով չէինք կիսվում մեր ծնողների հետ։ Օրինակ՝ դպրոցում կոնֆլիկտ ունենալիս տանը չէի պատմում, որովհետև մտածում էի՝ դա ավելի շատ պարսավանքի կարժանանա»,-նշեց Թագուհի Ղազարյանը։

Մեր զրուցակիցը վստահ է, որ մեր հասարակությունը կարող է համախմբվել և ցանկացած հարցի շուրջ գտնել անհրաժեշտ և ճիշտ ճանապարհը։ Երեխաները պետք է ունենան ապահովություն և  հնարավորություն՝ բոլոր զգայուն հարցերի շուրջ խոսելու համար։

 Պատգամավորը նկատում է նաև՝ գրքի շնորհանդեսը տապալած ակտիվիստներն ամենուր են, բոլոր տիպի թեմաներում նույն մարդիկ են միայն ընդդիմանում: 

«Ես  գիտեմ, որ դրանք հրապարակ նետված կեղծ օրակարգեր են՝ պառակտման  և բաժանարար գծեր ստեղծելու միտումով, բայց ես հավատացած եմ, որ Հայաստանի քաղաքացիները կարող են համախմբվել սիրո շուրջ, հոգատար լինել։ Ես հավատում եմ ՀՀ քաղաքացիների հավաքական իմաստնությանը և չեմ կարծում, թե այս կեղծ ճգնաժամերը կարող են որևէ ազդեցություն ունենալ»,-եզրափակեց Թագուհի Ղազարյանը։