Ուշքի եկեք, պարոնա՛յք. կառավարության դիմաց բողոքում են նախկին զինծառայողները (լուսանկարներ)
Հասարակություն
Այսօր՝ մայիսի 10-ին, ՀՀ կառավարության շենքի դիմաց ակցիա են իրականացնում նախկին զինծառայողները, որոնք թոշակի անցնելուց հետո բնակարաններով չեն ապահովվել։
«Անտուն սպան նույնն է, ինչ պետությունն առանց բանակի, ուշքի եկեք, պարոնա՛յք». այս և այլ կարգախոսներով նրանք փորձում են կառավարության ուշադրությունը հրավիրել իրենց բնակարանային խնդրի վրա:
«Մենք զինթոշակառուներ ենք և ըստ օրենքի՝ մեզ պետք է բնակարան հատկացվեր։ Պահանջում ենք, որ մեր իրավունքները չոտնահարվեն։ Հիմա կառավարությունը տարբեր նախագծեր է մշակում, որոնք նպաստավոր չեն մեզ համար»-,ԼՈՒՐԵՐ.com-ի հետ զրույցում ասաց փոխգնդապետ Հայկ Խաչատրյանը։
Խաչատրյանի խոսքով՝ ավելի քան 1000 զինծառայող ունի այս խնդիրը՝ նրանց անհատույց բնակարան չի տրամադրվել։ Ըստ նախկին զինծառայողների՝ խնդիրը պետք է լուծեին և՛ նախկին, և՛ ներկայիս իշխանությունները, քանի որ իրենք թոշակառու են՝ սկսած 2015 թվականից։
«Արդեն 8 ամիս է՝ պայքարում ենք։ Նամակներ ենք գրել, մասնակցել ենք նախագծերի մշակմանը։ Այսօր էլ պետք է քննարկվի նախագիծը, բայց կետեր կան, որոնց համաձայն չենք։ Պահանջում ենք, որ այդ նախագծի կետերը նպաստավոր լինեն մեզ համար»,-նշեց Խաչատրյանը։
Իրենց պահանջը չբավարարվելու դեպքում թոշակառու զինծառայողները պատրաստ են դատական կարգով լուծել հարցը։
ՈՒՂԻՂ ԵԹԵՐ
Ամենադիտված 
Այսօր մեր ընտանիքին բաժին հասավ ամենածանր կորուստը
