100 քմ-ն 250-ից փոքր է․ Արթուր Դավթյանն՝ իր աշխատասենյակի մասին

«Որևէ ազդակ կամ քաղաքական նշանակություն չի ազդում և չի կարող ազդել իմ որոշումների վրա»։ Այս մասին Ազգային ժողովում ասաց ՀՀ գլխավոր դատախազ Արթուր Դավթյանը՝ պատասխանելով հարցին, թե արդյո՞ք Արցախի երկու նախագահների նամակը քաղաքական ներքին ազդակ չէ։

Անդրադառնալով նրան, որ ՀՀ երկրորդ նախագահ Ռոբերտ Քոչարյանի պաշտպանները պատրաստվում են հաջորդ դատական նիստի ժամանակ ներկայացնել Արցախի նախագահների նամակն ու երաշխավորման հիմքերը, և դատախազությունը պարտավո՞ր է անդրադառնալ այդ նամակին, գլխավոր դատախազն ասաց․ «Դատախազությունն այդ փուլում՝ որպես կողմ, այդ օրը դիրքորոշում կհայտնի։ Դատախազությունը կներկայանա նիստին, և այդ օրն իր դիրքորոշումը կհայտնի»,- ասաց գլխավոր դատախազը՝ չբացառելով, որ հենց ինքը կլինի ելույթ ունեցողը։

Խոսելով դատախազության երկրորդ հարկը կառուցելու և իր աշխատասենյակի համար բավականին մեծ տարածք պահելու մասին, նա ասաց. «Այդ շենքի վերակառուցման աշխատանքները սկսվել են դեռևս 2013-ից, դրա հիմքում եղել է բացառապես պատմամշակութային շենքի այդ հատվածի ընդհանուր նկարագիրը պահելը: 2013 թվականին ես ուր էի, ես դեռևս Շենգավիթի դատախազն էի: Դա կառավարության որոշմամբ քաղաքաշինության նախարարության նախաձեռնությամբ իրականացված գործողություն է, որին դատախազությունը մասնակցություն ու ներդրում չի ունեցել: Այդ տիրույթում, այո՛, փոխել եմ իմ աշխատասենյակը, որպեսզի ավելի փոքրացնեմ իմ աշխատասենյակը, որպեսզի նախկին ավելի մեծ աշխատասենյակը հնարավորություն ունենամ բաշխել մի քանի հոգու և լուծել նաև այլ դատախազների՝ այդտեղ նստելու հարցը»,-ասաց Արթուր Դավթյանը։

Դիտարկմանը, թե 100 քմ է իր աշխատասենյակը, նա դա փո՞քր է համարում, գլխավոր դատախազը նկատեց․ «100 քմ-ն 250 քմ-ից փոքր է»։