Վտանգի զգացողության բացակայություն կա. ԼՀԿ պատգամավորն առաջարկում է փոքր կենտրոնի փողոցները միակողմանի դարձնել

«Մեծացել է մեքենաների տեսակարար կշիռը, ինչպես նաև անփորձ վարորդների թիվը, և բնական է, որ ճանապարհատրանսպորտային պատահարների թիվը ևս այս կոնտեքստում պիտի շատանա»,-ԼՈՒՐԵՐ.com-ի հետ զրույցում ասաց «Լուսավոր Հայաստան» խմբակցության պատգամավոր Հարություն Բաբայանը` անդրադառնալով վիճակագրական կոմիտեի՝ 2019թ. հունվար-մարտ ամիսներին ՀՀ-ում կատարված իրավախախտումների տվյալներին, համաձայն որոնց՝ նշված ժամանակահատվածում արձանագրվել է 5722 իրավախախտում՝ 358-ով ավելի է, քան 2018թ. նույն ժամանակահատվածում:

Պատգամավորի խոսքով, երևույթը տրամաբանական է, այն առումով, որ ժամանակին կաշառքով կամ շնորհակալությամբ շատերը կարողացել են վարորդական իրավունք ձեռք բերել: Հարցին, թե որքանով է խնդիրը խորքային, կարող ենք հատկանշական համարել այն, որ մեզ մոտ չկան երթևեկության մշակույթ, անվտանգ ճանապարհներ, անհրաժեշտ կանխարգելիչ համակարգեր, կամ կարո՞ղ ենք համարել իրավապահների վատ աշխատանքի արդյունք, Հարություն Բաբայանը պատասխանեց. «Ինչ վերաբերում է վարորդական մշակույթին, այո՛, մենք այդ առումով կաղում ենք, որովետև մեզ մոտ երթևեկության էթիկայի լիակատար բացակայություն կա: Այդ էթիկան բացակայում է և՛ վարորդների մոտ, և՛ հետիոտների մոտ: Երբեմն վթարների պատճառ հետիոտներն են դառնում:Մեզ մոտ տարօրինակ մի բան, որ անկեղծ ասած, չեմ կարող բացատրել: Մարդիկ կամ անվախ են, կամ արհամարհում են, ամեն դեպքում, կարծեք թե վտանգի զգացողության բացակայություն կա: Ես իրավապահներին առհասարակ չեմ մեղադրում: Նրանք այս գերծանրաբեռնվածության պայմաններում իդեալական են աշխատում: Ես երախտապարտ եմ նրանց, որ այս պայմաններում իրենց նյարդերը ներում են և կարողանում են վարորդների հետ «յոլա գնալ»»,-ասաց Պատգամավորը:

Դիտարկմանը, թե այս պայմաններում նաև շատ վարորդներ շարունակ պահանջում և պնդում են, թե վարչապետ Նիկոլ Փաշինյանը խոստում է տվել, սակայն հետևողական չէ իր խոստմանը` արագաչափերի և կարծիր գծերի ապամոնտաժման վերաբերյալ, պատգամավորը նկատեց.

«Արագաչափերի անհրաժեշտությունը կա: Ես չեմ ուզում կապել պարոն Փաշինյանի խոստումների հետ, եթե անգամ խոստացել է, ապա ես այդ խոստմանը դեմ եմ եղել ի սկզբանե: Պետք չէ, որ այդ խոստումը պահվի: Արագաչափերը վարորդների կամակորությունը զսպող միակ հանգամանքն են: Իհարկե, տգիտություն է այն, որ նրանք տուգանվելուց վախենում են, բայց կյանքի կորստից չեն վախենում: Ես կողմ եմ, որ արագաչափերը տրամաբանված տեղերում լինեն: Նաև արագաչափերի թույլատրելի արագության հաճախակի փոփոխություններն են շեղում վարորդներին, լավ կլինի, որ դրանք սիստեմավորված թույլատրելի արագությամբ լինեն»,-ասաց Բաբայանը: Ամփոփելով իր խոսքը, պատգամավորը նշեց, որ դեռ ավագանու անդամ եղած ժամանակ ինքն առաջարկել է, որ Երևանում` հատկապես փոքր կենտրոնում, փողոցները միակողմանի դառնան` մեծ շրջադարձերով: Նրա խոսքով` գուցե մի փոքր երկարի վարորդների ճանապարհը, բայց միանշանակ, կթեթևանա փողոցների ծանրաբեռնվածությունը:

Սիլվի Տիգրանյան