Սերգեյ Բագրատյանի դեմ քրգործ չի հարուցվի. ՀՔԾ-ն մերժել է
Իրավունք
Հատուկ քննչական ծառայության քննիչի կողմից որոշում է կայացվել Վայոց Ձորի մարզպետի տեղակալի հաղորդման առթիվ նախապատրաստված նյութերով քրեական գործ հարուցելը մերժել։ Այս մասին ԼՈՒՐԵՐ․com-ի հետ զրույցում ասաց ՀՔԾ մամուլի քարտուղար Մարինա Օհանջանյանը:
«Քրեական գործի հարուցումը մերժվել է ՀՀ ՔՕ-ի 258-րդ հոդվածով նախատեսված խուլիգանության հանցակազմի բացակայության հիմքով»,- ասաց նա:
Հիշեցնենք, որ Վայոց Ձորի փոխմարզպետ Ռազմիկ Տոնոյանը հաղորդում էր ներկայացրել ոստիկանություն, որ պատգամավոր Սերգեյ Բագրատյանն ու Եղեգիս համայնքի Արտաբույնք բնակավայրի վարչական ղեկավար Արմեն Սեդրակյանը ապրիլի 27-ին հարձակվել են իր վրա, անհարգալից վերաբերմունք ցուցաբերել, իր հասցեին հնչեցրել հայհոյանքներ:
Նշենք, որ Վայոց ձորի փոխմարզպետ Ռազմիկ Տոնոյանը իր ֆեյսբուքյան էջում հրապարակել էր լուսանկար ԲՀԿ-ական պատգամավոր Սերգեյ Բագրատյանի հետ տեղի ունեցած միջադեպից։ Սակայն Սերգեյ Բագրատյանը հերքել էր իր մասնակցությունը միջադեպին:
Iravunk.com կայքն էլ, վկայակոչելով տեղի իր աղբյուրին, հաղորդել էր, որ Քաղաքացու օրվան նվիրված միջոցառմանը Եղեգնաձորի քաղաքացիները նկատել են, որ մոտ 30 մետր հեռավորության վրա երիտասարդ տղաները և փոխմարզպետ Տոնոյանը բարձր խոսում են: Քաղաքացիները խնդրել են պատգամավորին մոտենալ և միջամտել տղաների խոսակցությանը, որպեսզի ավել-պակաս բան չլինի: Երբ պարոն Բագրատյանը մոտեցել է՝ հարցրել է փոխմարզպետին, թե ինչու են հարամում քաղաքացու օրը, փոխմարզպետը միանգամից ոգևորված դիմելով պատգամավորին՝ ասել է՝ «տո դու ով ես»: Այդ ընթացքում միջամտել է Արտաբույնքի համայնքապետը, ասելով, թե դու ինչի չգիտես, թե ով է պատգամավոր Բագրատյանը: Փոխմարզպետը սկսել է անվայել վարքագիծ դրսևորել, ասելով՝ «դե տեսեք, հեսա սաղիդ նկարեմ, ձայնագրեմ՝ գնամ վրեքներդ գրեմ»:
Հիշեցնենք, որ Սերգեյ Բագրատյանը Վայոց Ձորի պատգամավորն է: Գործը դատախազությունից ուղարկվել էր Հատուկ քննչական ծառայություն:
ՈՒՂԻՂ ԵԹԵՐ
Ամենադիտված 
«Անցած գիշեր Գյումրիի երկնքում բնակիչները ֆիքսել են այսպիսի լուսին». Գագիկ Սուրենյան (տեսանյութ)
