ՀՀ ԱԻՆ փրկարար ծառայության տնօրենն ընդունել է ԱՄՆ Եվրոպական հրամանատարության աղետների պատրաստվածության գնահատման թիմին

ՀՀ ԱԻՆ  փրկարար ծառայության տնօրեն, փ/ծ գնդապետ Արտակ Նահապետյանը մայիսի 13-ին ընդունեց ԱՄՆ Եվրոպական հրամանատարության աղետների պատրաստվածության գնահատման թիմին:

Ինչպես  հայտնեցին ՀՀ արտակարգ իրավիճակների նախարարությունից, թիմի մասնագետների՝ Հայաստան այցելության նպատակը աղետների պատրաստվածության և արձագանքման հարցերի վերաբերյալ համապետական գնահատում կատարելն է:

Թիմի կազմում ընդգրկված են ԱՄՆ ցամաքային զորքերի ինժեներական կորպուսի քաղաքացիական, ռազմական արտակարգ իրավիճակներին պատրաստվածության ծրագրի (CMEP) ղեկավար Սքոթ Մորլենդը, ծրագրի համակարգող Կարլ Ֆրանցը, ռազմական համագործակցության գրասենյակի ղեկավար Սթիվըն Չուն, գրասենյակի ներկայացուցիչներ Անի Մելքումյանը և մի շարք այլ փորձագետներ:

Համապետական ձևաչափով գնահատումը կատարվելու է առաջին անգամ: Հանդիպման ընթացքում հանգամանալից քննարկվեց քաղաքացիական, ռազմական արտակարգ իրավիճակներին պատրաստվածության ծրագիրը (CMEP) և ծրագրի շրջանակներում իրականացվող գնահատման մեթոդաբանությունը:

Ողջունելով հյուրերին՝ Արտակ Նահապետյանը բարձր գնահատեց ամերիկյան կողմի հետ համագործակցության մակարդակը՝ շեշտելով, որ տարաբնույթ ծրագրերի շրջանակներում ցանկացած նմանատիպ հանդիպում շատ արագ տալիս է իր առարկայական արդյունքը:

Արտակ Նահապետյանը վստահություն հայտնեց, որ այդ առումով բացառություն չի հանդիսանա նաև այս հանդիպումը՝ ներկաներին մաղթելով բեղուն համատեղ աշխատանք:

Շնորհակալություն հայտնելով փրկարար ծառայության տնօրենին հանդիպման հնարավորության համար՝ Կարլ Ֆրանցը նշեց, որ գնահատման արդյունքում պետք է վեր հանվեն վտանգներին Հայաստանի պատրաստվածության առկա կարողություններն ու հնարավորությունները, արտակարգ իրավիճակներին արձագանքման ոլորտում տարբեր գերատեսչությունների համագործակցության մակարդակը:

Գնահատման արդյունքները արտացոլվելու են գրավոր զեկույցում, որն էլ հետագայում օգտագործվելու է երկկողմ համագործակցության և աջակցության առաջնահերթությունները հատկանշելու համար։

Հանդիպումից հետո հյուրերը այցելեցին ԱԻՆ Ճգնաժամային կառավարման ազգային կենտրոն (ՃԿԱԿ): Այցելության ընթացքում կենտրոնի պետ, փ/ծ գնդապետ Հովհաննես Խանգելդյանը մանրամասն ներկայացրեց ՃԿԱԿ առաքելությունը, գործունեությունը և գործառույթները՝ նշելով, որ կենտրոնի ստեղծման ժամանակ հայկական կողմը մանրակրկիտ ուսումասիրել և դիտարկել է ոլորտում միջազգային, մասնավորապես, ամերիկյան փորձը: