Ցեղասպանություն էլի չի լինի, քանի որ մենք 1945 -ի ու Ղարաբաղի հաղթանակի հերոսների որդիներն ու թոռներն ենք․ Արա Աբրահամյան

Երևանում «Մոսկվայի տանը» Ռուսաստանի հայերի միության, Համաշխարհային հայկական կոնգրեսի նախագահ  Արա Աբրահամյանի նախաձեռնությամբ տեղի ունեցավ «Ճակատագրերը տարբեր են, հաղթանակը՝ մեկն է» խորագրով միջոցառում՝ Հայրենական մեծ պատերազմի մասնակից վետերանների համար։ Միջոցառմանը մասնակցում են նաև Արա Աբրահամյանի հրավերով Հայաստան ժամանած   1941-45 թվականների հայրենական պատերազմի հաղթանակի մարշալների զավակներն ու թոռները։

Միջացառման ժամանակ իր ելույթում Արա Աբրահամյանն ասաց, որ այսօր  ինչ էլ  ասեն վետերաններին, դա շատ քիչ է, դա գրեթե ոչինչ է այն ամենի դիմաց ինչ նրանք արել են։

«Այսօր մեր գլխավոր խնդիրն է՝ լիներ ձեր կողքին, ասել ձեզ սիրո և երախտիքի խոսքեր և թեթևացնել ձեր կյանքը։ Իսկ մեր երկրորդ խնդիրն այսօրվա երիտասարդներին հաղթանակի զգացողությունը փոխանցելն է, որը դուք փոխանցել եք մեզ։ Անգամ ֆիլմեր հնարավոր չէ հեշտությամբ դիտել, թե ինչպիսի պայմաններում եք դուք հաղթել։ Մեր հյուրերից մեկն այսօր ասաց, որ հայկական բարձր լեռները միշտ կանգուն են, քանի որ դրանց կողքին կան փոքր լեռներ։ Ձեզանից յուրաքանչյուրը՝ զինվորից  գեներալ ու մարշալ, բոլորդ միասին եք հաղթել։ Ձեզանից յուրաքանչյուրն ունի իր տեղը այդ հաղթանակում։ Եվ պետք է նշեմ, որ մենք՝ հայերս հաղթանակում մեր առանձնահատուկ տեղն ունենք»,-ասաց Արա Աբրահամյանը։

Նա նաև նշեց, որ Հայոց ցեղասպանության զոհերի հիշատակի օրը մի հավաքի ժամանակ, ինքն ասել է, որ ցեղասպանությունը այլևս երբեք չի լինի, քանի որ մենք 1915 թվական հայերը չենք, մենք 1945 թվականի հաղթանակած հայերի որդիներն ու թոռներն ենք, մենք Ղարաբաղի ու Շուշիի հաղթանակի սերունդնենք։

Խոսելով հայ-ռուսական հարաբերությունների մասին՝ Արա Աբրահամյանն ասաց, որ Ռուսաստանում երեք միլիոնից ավելի հայ է բնակվում և իրենք այնտեղ լավ են ապրում։

«Մենք այնտեղ զարգանում ենք, ունենք աշխարհում հայտնի տասնյակ լավագույն գիտնականներ, այնտեղ մենք հնարավորութուն ունենք լինել լավից լավը։ Մի օր մենք կգանք, կհավաքվենք ու կստեղծենք հզոր Հայաստանը»,-իր խոսքն այսպես եզրափակեց Արա Աբրահամյանը։