«Ինչքան Արարատի մարզում կոկորդիլոսներ կթռչեն, էնքան մենք Քոչարյանի համար ակցիա կանենք»․ ողջաբերդցիները վրդովված են

Ողջաբերդի բնակիչները կրկին փողոց են դուրս եկել՝ պահանջելով, որ լուծվի իրենց սողանքային գոտում գտնվող տների համար փոխհատուցում տալու հարցը: Թեև ԼՈՒՐԵՐ․com-ի հետ զրույցում Կոտայքի մարզպետ Ռոմանոս Պետրոսյանն ասել էր, որ հարցն իր վերահսկողության տակ է և բնակիչներին մինչև ամսի 20-ը պատասխան կտրվի, սակայն վերջիններս կրկին բողոքի ակցիա են իրականացնում։

Նրանց նաև վրդովվեցրել է մարզպետի հայտարարությունը, թե բողոքի ակցիան սաբոտաժ է և անմիջական կապ ունի ՀՀ 2-րդ նախագահ Ռոբերտ Քոչարյանի գործի քննության հետ։

«Աբսուրդի, մառազմի աստիճանի է մեր մարզպետի ասածը։ Ինչքան Արարատի մարզում կոկորդիլոսներ կթռչեն, էնքան մենք Քոչարյանի համար ակցիա կանենք։ Մենք բացարձակ կապ չունենք դրա հետ։ Մեր պահանջը բոլորովին այլ է։ Մարզպետը պետք է անհանգստա իր գյուղի բնակչի անվտանգ ապրելու համար, մեր ուզածն ընդամենն այն է, որ մեր պահանջը հասցնի վարչապետին։ Մենք վստահ ենք, որ մեզ համար հույժ կարևոր խնդրի մասին վարչապետը չգիտի»,- ասում են ողջաբերդցիները։

Ավելի վաղ՝ մեզ հետ զրույցում Կոտայքի մարզպետն ասել էր․ «Ես միտում եմ տեսնում Ռոբերտ Քոչարյանի և այս բողոքի ակցիայի միջև․ ինչպես դատարանի դիմաց է դրամատիկական զարգացումներ տեղի ունենում, նույն տրամաբանության մեջ էլ ակցիան է։ Քոչարյանի դատավարությանը զուգընթաց տեղի է ունենում քաղաքական սաբոտաժ, քանի որ Քոչարյանը նախկին համակարգի ներկայացուցիչներ ունի մեր սոցիումի տարբեր շերտերում, որոնք կարող են դժգոհության ֆոն ստեղծել՝ բողոքի ակցիաները թեժացնելով տարբեր համայնքներում»,-մեզ հետ զրույցում ասել էր Ռոմանոս Պետրոսյանը։