Երևանի մետրոպոլիտենի տնօրենն ազատվել է աշխատանքից. ինքն է ցանկացել

Երևանի Կ. Դեմիրճյանի անվան մետրոպոլիտենի տնօրեն Փայլակ Յայլոյանն աշխատանքից ազատման դիմում է ներկայացրել։ Տեղեկությունը ԼՈՒՐԵՐ.com-ի հետ զրույցում հաստատեց Կարեն Դեմիրճյանի անվան Երևանի մետրոպոլիտենի մամուլի խոսնակ Տաթև Խաչատրյանը:

«Այո՛, պարոն Յայլոյանն աշխատանքից ազատման դիմում է ներկայացրել, ինչը կապված է կենսաթոշակային տարիքը լրանալու հետ: Իր դիմումի համաձայն գնում է վաստակած հանգիստը վայելելու: Նա 28 տարի աշխատել է Մետրոպոլիտենում, սակայն վերջին 4 տարվա ընթացքում հանգստի չէր մեկնել»,- ասաց Մետրոպոլիտենի մամուլի խոսնակը:

Նրա փոխանցմամբ՝ այսօր Փայլակ Յայլոյանի աշխատանքային վերջին օրն է, և երկուշաբթի օրվանից տնօրենի պարտականությունները ժամանակավորապես կկատարի նրա տեղակալը՝ երթևեկության մասնաճյուղի պետ Գևորգ Ավետիսյանը։

Վերջին շրջանում, ըստ մամուլում շրջանառվող տարբեր լուրերի, Երևանի մետրոպոլիտենում լուրջ չարաշահումներ կան, որի վերաբերյալ նաև հարուցվել է քրեական գործ:

Հարցին՝ տնօրենի աշխատանքից ազատվելը հնարավո՞ր է նաև սրանով է պայմանավորված, Խաչատրյանը պատասխանեց. «Քանի որ գործը դեռևս գտնվում է նախաքննության փուլում և ԱԱԾ-ն որևիցե մի փաստաթուղթ չի ներկայացրել, ես չեմ տիրապետում այլ ինֆորմացիայի: Միայն կարող եմ ասել, որ վերջին տարիներին մետրոպոլիտենն աշխատել է շահույթով և նույնիսկ վճարել է շահութահարկ»,- ասան նա՝ նշելով, որ պետք է սպասել նախաքննության արդյունքներին:

Հիշեցնենք, որ Հայաստանի Ազգային անվտանգության ծառայությունը քրգործ էր հարուցել Երևանի մետրոպոլիտենում չարաշահումների փաստով: Այս հրապարակումները, սակայն, Երևանի մետրոպոլիտենից հերքել էին, թե որևէ չարաշահում չի արձանագրվել և վերջին 2 տարում մետրոպոլիտենն աշխատել է շահույթով: Սակայն Մետրոպոլիտենի մամուլի ծառայությունը հերթական անգամ հերքում էր չարաշահումների մասին տեղեկությունը:

Նշենք, որ «Ժամանակ» թերթը գրել էր` մետրոպոլիտենը տարիներ շարունակ հայտարարագրել է մեծ վնասներ՝ պետությունից ստանալով հսկայական պետական դոտացիաներ, իսկ այդ ամենը հնարավոր է դարձել նաև մետրոպոլիտենի գնումները համակարգող Անի Գսպոյանի շնորհիվ, որը ՊԵԿ խոշոր հարկ վճարողների տեսչության պետ Էդիկ Գսպոյանի դուստրն է։

Միաժամանակ, Մետրոպոլիտենի մամուլի ծառայությունը հաղորդագրություն էր տարածել՝ նշելով, որ Անի Գսպոյանը շարքային աշխատող է ու չէր կարող որևէ ազդեցություն ունենալ այս կամ այն գործընթացի վրա։ Նշվում էր, որ Անի Գսպոյանի աշխատելու ժամանակահատվածում մետրոպոլիտենն աշխատել է շահույթով․ մասնավորապես՝ 2017 թվականին Երևանի մետրոպոլիտենի շահույթը կազմել է 358․256․229 ՀՀ դրամ, իսկ ՀՀ պետական բյուջե է վճարվել 71․651․246 ՀՀ դրամ շահութահարկի գումար։ Նախնական արդյունքներով 2018 թվականին մետրոպոլիտենը ևս աշխատել է շահույթով, որը կազմում է մոտ 513 մլն ՀՀ դրամ, իսկ վճարվելիք շահութահարկը՝ մոտ 103 մլն ՀՀ դրամ։

Սոնա Հարությունյան