Միգուցե վաղը կունենանք ավելի լավ պատժողական համակարգ, որպեսզի կալանքը չլինի ինքնանպատակ. Քոչարյանի պաշտպան

Դատավարությունն ընթացել է ընդհանուր առմամբ՝ հարթ, մի քանի կարևոր բացթողումներով: Այս մասին այսօր՝ մայիսի 17-ին, մամուլի ասուլիսի ժամանակ ասաց ՀՀ երկրորդ նախագահ Ռոբերտ Քոչարյանի պաշտպան Արամ Օրբելյանն՝ ամփոփելով դատավարության արդյունքները: 

«Դատավարության ամենամեծ բացթողումը՝ փաստացիորեն, մեղադրական կողմը մեկ անգամով ավել է հանդես եկել: Ամբողջ աշխարհում ընդունված ընթացակարգն է, որ ելույթները զույգ են լինում: Այսինքն՝ կա մեղադրանք- պաշտպանություն և մեղադրանք-պաշտպանություն-փաստարկներ-հակափաստարկներ՝ արդյունքում հիմք ընդունելով այն փաստը, որ կալանքի նիստերի գործընթացը շատ կանոնակարգված չէ»,-ասաց Օրբելյանը:

Օրբելյանի խոսքով՝ հրավիրված ասուլիսի նպատական այն է, որ կարողանան մի շարք հակափաստարկների անդրադառնալ, որոնք ներկայացված են եղել դատախազության առարկությունների շրջանակներում: 

«Մնացած բոլոր առումներով, կարծում եմ՝  դատավարությունը բավականին նորմալ և  թափանցիկ է անցել, որոշակի լարված պահեր կային, բայց դա ցանկացած դատավարության ժամանակ լինում է»,-ասաց Օրբելյանը:

Օրբելյանը մի քանի հանգամանքների վրա ուշադրություն հրավիրեց. «Ցավոք սրտի, ՀՀ-ն շարունակում է ունենալ սովետական դատախազության մոտեցում, որ պետք է բոլորին ձերբակալել, որովհետև բոլորը հանցագործ են: Այս մոտեցումը, ցավոք, չի փոխվում: Շարունակում է այդ հույսը մնալ, որ միգուցե վաղը կունենանք ավելի լավ պատժողական համակարգ, որպեսզի մարդու դատաքննության ժամանակ կալանքը չլինի ինքնանպատակ:  Սրա ամենատիպիկ օրինակը գլխավոր դատախազի՝ դատարան կցկտուր մոտենալն է, այսինքն՝ մենք կողմ ենք, որ գլխավոր դատախազը ներկա լինի և վարի այդ գործը, որովհետև այս գործը իր բարդությամբ այնպիսին է, որ  ենթադրում է նման մակարդակի մասնակցություն, բայց ակնհայտորեն օգուտ չի բերում, երբ որ գլխավոր դատախազը ներկայանում է առաջին նիստին, երկրորդ նիստի, ներկա է լինում այն ժամանակ, երբ Արցախի նախագահները դատարանում էին և իր փակման խոսքում համարյա սպառնում է դատարանին»: