ժողովուրդն իր ձայնը բարձրացնում է կառավարության շենքի մոտ, ԱԺ մոտ, ինչո՞ւ չպիտի բարձրացնի դատարանների մոտ․ պատգամավոր

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դիմաց քաղաքացիները շարունակում են բողոքի ակցիան: ԼՈւՐԵՐ.com-ի հետ զրույցում Ազգային ժողովի պատգամավոր Նարինե Թուխիկյանը, նշեց, որ իրենք` պատգամավորներով, չեն փակել դատարանի դռներ, պարզապես ներկա են, որպեսզի հնարավոր սադրանքների դեպքում միջամտեն և զերծ պահեն անախորժություններից:

Անդրադառնալով երեկվանից շրջանառվող հայտարարություններին, թե վարչապետի կոչը հակասահմանադրական է, պատգամավորը չհիմնավորեց ոչ դա և ոչ էլ հակառակը. «Ես չեմ մեկնաբանի, որովհետև դա շատ մասնգիտական հարց է: Մասնագետները կնստեն սեղանի շուրջ, կհասկանան՝ հակասահմանադրական է, թե սահմանադրական: Կհասկանան նաև, թե որոնք են եղել հակասահմանադրական քայլերը նախկինում և ինչու դրանք համապատասխան պատժի չեն արժանացել»-ասաց նա:

Հարցին, թե նա և՞ս կարծում է, որ սա դատական համակարգի բարեփոխման լավագույն տարբերակն է, պատգամավորը պատասխանեց. «Սա ժողովրդի ընդվզումն է և ժողովուրդը ցանկացած պարագայում կարող է խոսել, իր բողոքի ձայնը բարձրացնել: ժողովուրդն իր ձայնը բարձրացնում է կառավարության շենքի մոտ, Ազգային ժողովի մոտ, ինչո՞ւ չպիտի բարձրացնի դատարանների մոտ: Դա նորմալ է»,-ասաց պատգամավորը` նշելով, որ սպասում է քիչ հետո վարչապետի հայտարարությանը` հասկանալու համար հետագա քայլերը:

Սիլվի Տիգրանյան