Մեր ամենամեծ վտանգներից մեկը

Հարցազրույցներ 20 Մայիս, 2019 16:58

Ըստ տեղեկությունների՝ Արցախի նախագահ Բակո Սահակյանը Երևանում է և պատրաստվում է այսօր խորհրդարանում հանդիպել ԱԺ «Իմ քայլը» խմբակցության պատգամավորների հետ: Հիմնական թեման լինելու է վարչապետ Նիկոլ Փաշինյանի՝ այսօր Արցախի վերաբերյալ արած հայտարարությունը։ Տեղեկությունը ճշտելու համար ԼՈՒՐԵՐ․com-ը զրուցեց Արցախի Հանրապետության նախագահի խոսնակ Դավիթ Բաբայանի հետ, սակայն վերջինս ոչ հերքեց, ոչ էլ հաստատեց լուրը՝ նշելով, որ նման տեղեկատվության չի տիրապետում, երբ լինի՝ բոլորը կիմանան այդ մասին։

Հարցին՝ այս պահին որտե՞ղ է գտնվում Բակո Սահակյանը, Բաբայանը կառուցողական պատասխան տվեց․ «Նախագահը հայրենիքում է։ Աշխատանքային առօրյայի մեջ է»։ Հետաքրքրվեցինք՝ նկատի ունի Արցա՞խը, թե՞ Հայաստանը, ԱՀ նախագահի մամուլի խոսնակը հորդորեց չտարանջատել դրանք․ «Մեր հայրենիքը մեկն է»։

Այսօր ՀՀ վարչապետ Նիկոլ Փաշինյանը հայտարարեց, որ Հայաստանում կան քաղաքական ուժերի ներկայացուցիչներ, ովքեր օրումեջ հայտարարում են, թե իրենց կառավարությունը դավադրություն է պատրաստում և նենգ մտադրություններ ունի Արցախի դեմ։ Նշեց նաև, որ դրա տակ տեսնում է ընդհուպ դավադիր պատերազմ հրահրելու, անգամ որոշ տարածքներ հանձնելու և տեղի ունեցածի պատասխանատվությունը Հայաստանի կառավարության վրա դնելու հեռահար նպատակ:

Անդրադառնալով Փաշինյանի հայտարարություններին, Բաբայանը նկատեց, որ նա մի շարք կարևոր հայտարարություններ է արել․ «Անթույլատրելի է հայ ժողովրդի պառակտումը՝ հայաստանցի, ղարաբաղցի ձևակերպմամբ: Սա մեր ամենամեծ վտանգներից մեկն է։ Մենք նման գաղափարներ արտահայտող մարդկանց նկատմամբ պետք է ունենանք հստակ դիրքորոշում, որը պետք է լինի ինչպես ժողովրդի զզվանքն արտահայտելու միջոցով, այլև իրավական տեսանկյունից։ Հարցը համապարփակ ձևով պետք է դիտարկել և իրավական պատասխանատվության ենթարկել»,- նշեց նա։

Հարցին՝ պատերազմ հրահրելու, հողեր հանձնելու միտում տեսնո՞ւմ եք որևէ քաղաքական ուժի ներկայացուցիչների կողմից, Բաբայանը նշեց․ «Քաղաքական, վերլուծական, հասարակական դաշտում կան, չէ՞ մարդիկ, որոնք այդպիսի գաղափարներ են արտահայտում։ Հետևաբար, նման գաղափարներ ունեցողները, ովքեր մեր միասնականությունը խարխլում են՝ պետք է արժանանան համապատասխան վերաբերմունքի պետության ու հասարակության կողմից»,- ասաց Դավիթ Բաբայանը։

Սոնա Հարությունյան