Վարդան Ղուկասյանի եղբորորդուն ՔԿՀ-ում «120 կիլոգրամանոց գազանը ուզեցել է մորթել»

Մայիսի 19-ին «Արթիկ» ՔԿՀ–ում 2 դատապարտյալի միջև միջադեպ է տեղի ունեցել: Փորձել են դանակահարել Շեկո մականունով հայտնի Արտյոմ Կարապետյանի սպանության համար 17 տարվա ազատազրկման դատապարտված Վահե Ղուկասյանին, ով Գյումրու նախկին քաղաքապետ, ԱԺ  պատգամավոր Վարդան Ղուկասյանի եղբորորդին է։

Տեղեկությունը ԼՈՒՐԵՐ.com-ի հետ զրույցում հաստատեց Քրեակատարողական վարչության հանրային կապերի բաժնի պետ Նոնա Նավիկյանը: Նա նշեց, որ Ղուկասյանի խցում տեղի է ունեցել վիճաբանություն, որից հետո 2 դատապարտյալ միմյանց մարմնական վնասվածքներ են պատճառել. «Նրանք տեղում բուժօգնություն են ցուցաբերել. նրանց հիվանդանոց տեղափոխելու անհրաժեշտություն չի եղել»,- փոխանցեց Նավիկյանը։

Մեզ հետ զրույցում Գյումրու նախկին քաղաքապետ Վարդան Ղուկասյանը ևս հաստատեց տեղեկությունները՝ նշելով, որ այս ամենում կազմակերպված դիտավորություն է տեսնում. «Ճշտեք գաղութի պետից, կալանավայրերի վարչությունից, թե ինչ է տեղի ունեցել, նրանք ամեն ինչից տեղյակ են: Եթե իրենք տեղյակ չլինեն՝ նմանատիպ բան տեղի չի ունենա: Գաղութներում նման բան է տեղի ունենում, երբ խցերի դռները բաց են թողնում, որ էդ 120 կիլոգրամանոց գազանը մտնի, ուզենա երեխուն մորթել, ուրեմն դրա մասին ովքե՞ր գիտեն՝ իհա՛րկե կալանավայրերի վարչությունն ու ներքին աշխատակիցները, ուժայինները, ուրիշ ոչ մի բան»,- իր վրդովմունքն արտահայտեց Ղուկասյանը:

Հարցին՝ ինչ-որ վնասվածներ ստացե՞լ է եղբորորդին, Ղուկասյանը պատասխանեց. «Վիզն են կտրել, մի 4-5 տեղից խփած է երեխեն ու էդպես պահում են: Լյարդը ուռած էր, հիվանդանոցներ էինք ուզում տանեինք, չթողեցին»,- նշեց նա: 

Նշենք, որ փաստի կապակցությամբ  Արթիկի քննչական բաժնում նյութեր են նախապատրաստվում։

Հիշեցնենք, որ Շիրակի մարզի ընդհանուր իրավասության դատարանը 2014թ. հուլիսի 22-ին, Արտյոմ Կարապետյանի («Շեկո») սպանության մեջ մեղադրվող՝ Գյումրու նախկին քաղաքապետ Վարդան Ղուկասյանի եղբորորդուն՝ Վահե Ղուկասյանին մեղավոր է ճանաչել ՀՀ քրեական օրենսգրքի 34-104 հոդվածի 2-րդ մասի 1-ին եւ 6-րդ կետերով, 104 հոդվածի 1-ին մասով (սպանությունը) եւ 235 հոդվածի 1-ին մասով(ապօրինի կերպով զենք–զինամթերք կրելը) եւ դատապարտեց 17 տարվա ազատազրկման։

Սոնա Հարությունյան