Ցանկության դեպքում Նիկոլ Փաշինյանը հրապարակը նորից կլցնի. Ալեն Սիմոնյան

«Ընդդիմության շոկային և էմոցիոնալ վերաբերմունքը, կարծում եմ, պահի տակ եղած վերաբերմունք էր: Կարծում եմ, որ ՀՀ-ում նույն ընդդիմությունը դեռ չի ընկալել, որ իշխանությունն այլևս ժողովրդինն է»,- այս մասին լրագրողների հետ զրույցում ասաց Աժ փոխնախագահ Ալեն Սիմոնյանը` անդրադառնալով դատարանների մուտքերն ու ելքերը փակելու մասին վարչապետ Նիկոլ Փաշինյանի կոչից հետո եղած քննադատություններին:

Հարցին` եթե վաղը Աժ-ից դժգոհ լինեն, նույն ժողովուրդը պետք է հավաքվի՞, Ալեն Սիմոնյանն ասաց. «Այո՛, եթե դա ժողովուրդն է` կարող են»:

Նկատառմանը, թե 1100 մարդ էր ընդամենը հավաքվել, Ալեն Սիմոնյանն արձագանքեց. «Ներողություն եմ խնդրում, իհարկե, բայց եթե լինեին 50 հազար, էլի այս նույն քննարկումը չէր լինելո՞ւ: Որևէ մեկի մոտ թող կասկած չլինի, որ Նիկոլ Փաշինյանը և «Իմ քայլը» դաշինքը ցանկության պարագայում Հանրապետության հրապարակը նորից կլցնի, որովհետև մենք ժողովրդի հետ համագործակցում ենք»,-ասաց Ալեն Սիմոնյանը: Հարցին, թե արդյո՞ք դա միջամտություն չէր դատաիրավական համակարգին, Ալեն Սիմոնյանը նշեց, որ անձամբ իր կարծիքով, դա միջամտություն չէր, քաղաքական ակցիա էր, և նման քաղաքական ակցիա տեղի է ունեցել նաև հեղափոխության օրերին: «Ես անձամբ մասնակցել եմ Վերաքննիչ դատարանի գործունեության սահմանափակմանը, մենք սահմանափակել ենք գործադիր իշխանությանը և այլն»,-ասաց նա:

Հարցին, թե վարչապետի կոչը վերաբերում էր բոլորին, բայց հարյուր հազարավոր քաղաքացիներ այդ օրը դուրս չեկան փողոց, ինչո՞ւ, Ալեն Սիմոնյանը պատասխանեց հարցադրումով. «Իսկ կարիք կա՞ր հարյուր հազարավոր քաղաքացիների: Այն փաստը, որ բոլոր դատարանները շրջափակված են եղել բողոքող քաղաքացիներով, դա արդեն խոսուն է»,-եզրափակեց նա:

Սիլվի Տիգրանյան