Այ սա խնդիր է

«Հեղափոխությունից հետո տոկոսների նվազումը այդքան շուտ չի լինի, որովհետև բանկերը մի քիչ այլ խնդիր է: Բանկերն ունեն իրենց ներքին կանոնակարգերը: Ավելի մեծ խնդիր է, թե որքանով են մեր քաղաքացիները շահագրգռված ներդրում անելու: Այ սա խնդիր է»,- ԼՈւՐԵՐ.com-ի հետ զրույցում ասաց տնտեսագետ, տնտեսական փորձագետ Վահագն Խաչատրյանը: Անդրադառնալով ներդրումների խնդրին, փորձագետն ասաց, որ իներցիան կա, բայց ներդրումները չկան. «Որպես քաղաքական գործոն, ամենակարևոր փաստը, որ կոչվում էր կոռուպցիա, համակարգային կոռուպցիա, արտոնություններ, ոչ մրցակցային իրավիճակ արդեն չկա և սա արդեն ստեղծում է ներդրումների մեծ դաշտ: Իհարկե, մարդիկ մտածում են, թե դա էլ պարզ չի, հնարավոր է փոխվի և այլն, գուցե նաև այդ է ներդրումներ դեռևս չունենալու պատճառը: Դրա համար հարկավոր է քաղաքական կայունություն: Կայունությունը վերաբերում է և ներքին, և արտաքին քաղաքականությանը և այդ առումով պետք է հաշվի առնել նաև, թե մենք ինչ տարածաշրջանում ենք գտնվում»,-ասաց նա:

Հարցին, թե որպես տնտեսական փորձագետ, ինչո՞վ է պայմանավորում բնակարանների թանկացումները, Վահագն Խաչատրյանը պատասխանեց. «Չեմ կարող միանշանակ ասել, որ բնակարանները թանկանում են, գուցե Երևանի որոշ հատվածներում է այդպես: Ամեն դեպքում, ես չեմ տեսնում այն դաշտը, որի պատճառով բնակարանների գինը պիտի թանկանա: Այդ առումով, մեկ ուրիշ մեծ ճշմարտություն կա, որ մեր այդ շուկան իրական արժեքից գերագնահատված է: Երբ, օրինակ, սկսեցին Հյուսիսային պողոտան կառուցել, դա մի շարք քաղաքական և տնտեսական նպատակ էր հետապնդում, որովհետև դա իշխանության նախաձեռնությունն էր և այդ շենքերի սեփականատերերը իշխանության ներկայացուցիչներ էին: Իրենք արհեստականորեն բարձրացրեցին այդ տարածքի տների գները: Հիմնականում այդպես է»,-եզրափակեց տնտեսագետը:

Սիլվի Տիգրանյան