Տարիներ հետո այս իշխանությանն են անհրաժեշտ լինելու ուժեղ փաստաբաններ. ՓՊ նախագահ

Այսօր՝ մայիսի 23-ին, տեղի ունեցավ մարդու իրավունքների և հանրային հարցերի մշտական հանձնաժողովի հերթական նիստը։ Նիստից հետո Փաստաբանների պալատի նախագահ Արա Զոհրաբյանը լրագրողների հետ զրույցում անդրադարձավ վերջին շրջանում քննարկված վեթինգի հարցին, թե արդյո՞ք այն արդյունավետ կլինի։

Պալատի նախագահը պատասխանեց հարցով՝  «Իսկ դուք գիտե՞ք ինչ է վեթինգը: Մինչև մենք չհասկանանք վեթինգը ինչ է, ում է այն վերաբերվում, ով է ստուգելու, ինչ եղանակով։ Արդյո՞ք պրոբլեմը միայն դատական իշխանությունում է։ Ի՞նչ են ուզում ստանալ և ի՞նչ գործիքակազմով»։

Հարցին, թե արդյո՞ք շատ են այն մարդիկ, որոնց վեթինգը կվնասի, Զոհրաբյանը օրինակ բերեց Գրիգոր Տաթևացու բնորոշումը։ «Դեռևս 14-րդ դարում Գրիգոր Տաթևացին ախտորոշել է։ Ասել է, որ արդար դատաստանը ծռվում է 4 պատճառով։ Առաջին՝ կաշառքը, երկրորդը՝ երեսպաշտությունը կամ կողմնակալությունը, երրորդը՝ վախը, չորրորդը՝ տգիտությունը։ Կարծում եմ՝ հիմա էլ այս ախտորոշումը արդիական է։ Հիմա պետք է նայել ոչ միայն՝ դատավորը լավն է, թե վատն է, այլ մտածել նաև համալիր գործողություններ իրականացնել՝ թեթևացնել դատավորի ծանրաբեռնվածությունը, բարջրացնել աշխատավարձերը։ Բոլորս էլ գիտենք, որ ոչ մի իշխանություն հավերժ չէ: Հաջորդ իշխանությունն է՞լ է փոփոխություններ անելու դատական համակարգում։ Երեք իշխանության ճյուղերից դատական իշխանությունը կայուն է և քաղաքական գործընթացների հետ կապ չունի, եթե ունենար՝ մենք չէինք ունենա արդարադատության համակարգ»։

Զոհրաբյանը նշեց, որ բոլոր համակարգերի նման՝ այս համակարգում էլ կան լավ դատավորներ և վատ դատավորներ։ Փաստաբան Հայկ Ալումյանի և պատգամավոր Հայկ Սարգսյանի «բախմանն» անդրադառնալով, Զոհրաբյանն ասաց.

«Պատգամավորը քաղաքական գործիչ է և տալիս է քաղաքական գնահատական։ Եթե կա շահերի բախում, ապա դրա համար նախատեսված են վարքագծի կանոնակարգ և նախատեսված է կարգապահական պատասխանատվություն։ Փաստաբանին պետք է մոտենալ պրոֆեսիոնալ տեսանկյունից, նա մասնագիտական գործունեություն է իրականացնում։ Եթե վաղը իշխանությունը փոխվի, և այս պատգամավորը խնդիր ունենա, ու ոչ մի փաստաբան չի ցանկանա իր հետ աշխատել։ Ոնց որ բժշկին հարցնենք՝ ինչո՞ւ եք վիրահատում այդ մարդուն, չէ՞ որ նա վատն է»։

Լրագրողի այն հարցին, թե արդյո՞ք դատական համակարգում կա վիրահատական միջամտության կարիք, Զոհրաբյանը կատակեց, ասելով, թե նայած ինչն ենք վիրահատելու. եթե գլուխը, ապա չկա անհրաժեշտություն, եթե խոցը՝ ապա՝ կա. «Ես դեմ եմ դատարանի գլուխը կտրելուն»,- շեշտեց պալատի նախագահը։

Փաստաբանական պալատը վերջին օրերի դեպքի վերաբերյալ (դատարանի մուտքերը փակելուն) հայտարարություն էր տարածել։ Պալատի նախագահը նշեց, որ արտահերթ նիստ գումարել են նաև 2018-ի ապրիլի 23-ին, երբ Նիկոլ Փաշինյանը կալանավորված էր և դատապարտել էին իշխանությունների գործելակերպը։ Զոհրաբյանի խոսքով՝ իշխանության կողմից ճնշում կարող է լինել միայն այն դեպքում, երբ օրենքով ձևափոխվի պալատը, սակայն տարիներ հետո այս իշխանությանն են անհրաժեշտ լինելու ուժեղ փաստաբաններ։