Նոր իշխանության լուրջ սխալը

«Այսօր մենք ունենք վիրավորված հասարակություն, որն օտարվել է լեգիտիմությունից: Եթե այսօրվա իշխանությունը վստահություն է ներշնչում, որ կլուծի այդ հարցերը, ապա դա չի նշանակում, որ այդ հարցերն ավտոմատ կլուծվեն: Անցումային արդարադատության ամբողջ իմաստը այդ իրավունքները վերականգնելն է»,-այս մասին Ազգային ժողովում լրագրողների հետ զրույցում ասաց ՀԱԿ փոխնախագահ Լևոն Զուրաբյանը:

Անդրադառնալով անցումային արդարադատությանը, Լևոն Զուրաբյանը նկատեց, որ այդ առումով լուրջ ուշացում է եղել նաև. «Հեղափոխությունից հետո ՀԱԿ-ը առաջ բերեց անցումային արդարադատության խնդիրը, դա պետք է սկսվեր շատ վաղուց, բայց չգիտեմ ինչու՝ կոռումպացված դատական համակարգի պահպանմանը իշխանությունները շատ հանգիստ վերաբերվեցին, և դա լուրջ սխալ էր: Ռոբերտ Քոչարյանի ապօրինի ազատումը հենց այդ սխալի հետևանք էր: Մենք շատ լավ գիտենք, թե ինչքան դատավորներ ունենք, որ կոռուպցիայի մեջ թաղված են: Անգամ հրապարակվեց մի նամակ, որտեղ մի դատավոր բողոքում է, որ կաշառքը արդար կերպով չի բաժանվել դատավորների միջև: Եթե ժամանակին անարդար վճիռ կայացրած դատավորները պատժվեին` հատկապես Մարտի 1-ի հետ կապված անարդար վճիռ կայացրած դատավորները՝ այսօր մենք այսպիսի խնդիր չէինք ունենա»,-ասաց Լևոն Զուրաբյանը:

Անդրադառնալով նոր իշխանությունների գործելաոճին, Զուրաբյանը նշեց, որ շատ խնդիրներ են նկատում և երբ նկատում են՝ բարձրաձայնում են. «Չնայած անփորձությանը, այս իշխանությունը իր բոլոր թերություններոով հանդերձ, շատ ավելի լավ է Հայաստանի համար, քան «ռոբասերժական ավազակները», ովքեր իրենց իշխանությունն օգտագործել են սեփական հարստացման համար և ամեն օր երազում են երանելի ժամանակների վերադարձի մասին»,-ասաց նա:

ԼՈւՐԵՐ.com-ի հարցին, արդյոք անփորձությունը չի՞ խանգարի նոր իշխանություններին, ըստ էության այս կարևոր մեխանիզմի՝ անցումային արդարադատության փուլում չսխալվելու և չվրիպելու համար, Լևոն Զուրաբյանը պատասսանեց.«Գիտեք, կարելի այսպես ասել` անփորձությունն արատ չի: Այդ վիճակը հիմա նաև բնական է: Անփորձությունը կարելի է հաղթահարել, եթե կա լուրջ ստրատեգիական կուրս և թիմային փոխհամաձայնեցված աշխատանք: Հարցը այստեղ հենց դա է` մենք տեսնելո՞ւ եք այդ ամենը, թե՝ ոչ: Սա դեռ բաց հարց է»,-ասաց Լևոն Զուրաբյանը:

Սիլվի Տիգրանյան