Այո՛, կան մանկապարտեզներ, որոնցից երեխաները տուն են վերադառնում քերծվածքներով․ Անի Սամսոնյան

ԼՈՒՐԵՐ.com-ի զրուցակիցն է Աժ «Լուսավոր Հայաստան» խմբակցության պատգամավոր Անի Սամսոնյանը, ով իր ֆեյսբուքյան էջում օրեր առաջ անդրադարձել էր Երևանի մանկապարտեզներից մեկում տեղի ունեցած դեպքին, երբ երեխան վնասվածքներ էր ստացել և տեղափոխվել հիվանդանոց։

Անդրադառնալով մանկապարտեզներում տեսանկարահանող սարքեր տեղադրելուն՝ Սամսոնյանն ասաց․

«Պետք է հասկանալ, թե որքանով է դա արդարացված և պետք է նաև քննարկել ծնողների հետ, որպեսզի հասկանանք՝ իսկապես կա՞ անհրաժեշտություն, թե՝ ոչ։ Այո՛, կան մանկապարտեզներ, որոնցից երեխաները տուն են վերադառնում քերծվածքներով և ծնողների մոտ կասկած է առաջանում՝ դա եղել է երեխա-երեխա կռվի արդյունքո՞ւմ, թե՞ եղել է դաստիարակի վերաբերմունքը։ Դրա համար պետք է քննարկենք, հասկանանք. եթե դեպքերը շատ են, անհրաժեշտություն կա՝ միգուցե հանդես գանք առաջարկով։ Կոնկրետ այդ երեխայի հետ կապված՝ ես դիմել եմ մարդու իրավունքների պաշտպանին։ Պարոն Թաթոյանը ոստիկանության հետ կապի մեջ է, և այնտեղ պետք է հասկանան, թե ինչպես է դեպքը եղել»։

Մեր դիտարկմանը, որ վերջին շրջանում դեպքերն ավելացել են ու անգամ մահվան դեպք է գրանցվել, ավելին՝ նախնական տվյալներով՝ մեղավորը դաստիարակն է եղել, և այս համատեքստում արդյո՞ք խնդիր չէ այն, որ շատ դեպքերում դաստիարակներն ընտրվում են առանց լիարժեք կրթություն ունենալու և վարվելաձևի իմացության՝ Սամսոնյանն ասաց.

«Քանի որ մանկապարտեզները պատկանում են համայնքին, մենք կարող ենք առաջարկել, որպեսզի ավագանին քննարկի այդ հարցը։ Երևանի ավագանու ԵԼՔ խմբակցությունը մինչև հեղափոխությունը նախատեսում էր քննիչ հանձնաժողով ստեղծել  մանկապարտեզների հարցերի հետ կապված, միգուցե այդ հարցը կրկին վերանայման կարիք ունի։ Նորից դնենք քննարկման, հասկանանք՝ եթե դաստիարակներն ունեն վերապատրաստման խնդիր՝ վերապատրաստվեն։ Բայց ես պետք է նաև  ասեմ, որ այստեղ խնդիրը ոչ միայն վերապատրաստումն է, այլև կա ուշադրության խնդիր։ Երեխաներ են, շարժուն են լինում, և դաստիարակը այլ գործով զբաղվելիս չի տեսնում, աչքաթող է անում։ Պետք է հասկանալ, որ բոլոր դեպքերը չեն, որ մտադրված են, այսինքն՝ պահի տակ էլ է լինում։ Դրա համար՝ չեմ կարող ասել, որ բոլոր մանկապարտեզներում կա խնդիր»։

Սամսոնյանի խոսքով քայլ առ քայլ պետք է առաջ գնալ, և խնդիրը ուսումնասիրել բոլոր կողմերից։