Գլխավոր խնդիրն անարդարությունն է. պատգամավորը` բուքմեյքերական ընկերության մասին

Երեկ «Գուդվին» բուքմեյքերական ընկերության աշխատակիցներն ակցիա էին իրականացնում Ազգային ժողովի մուտքերից մեկի դիմաց. նրանք անգամ փակել էին Բաղրամյան պողոտան: Պատճառն այն էր, որ Ազգային ժողովում քննարկվում էր մի նախագիծ, ըստ որի՝ բուքմեյքերական գրասենյակները Հայաստանի տարածքում գործելու են միայն Ծաղկաձոր, Ջերմուկ , Մեղրի և Սևան քաղաքներում: Տվյալ տարածքներում գրասենյակներ մուտք գործելիս քաղաքացիների ինքնությունը ստուգվելու է: Նախագիծը անդրադառնում է նաև գազալցակայաններում տեղադրված ապարատներին, որոնք նախագծի ընդունումից հետո ընդհանրապես կհանվեն բոլոր տեղերից: Նախագծի, դրա առավելությունների և խնդիրների մասին ԼՈՒՐԵՐ.com-ը զրուցեց Աժ «Լուսավոր Հայաստան» խմբակցության պատգամավոր Արկադի Խաչատրյանի հետ: Խաչատրյանն իր խոսքում նշեց, որ իր տեղեկություններով ակցիա իրականացնողների դժգոհությունն այն է, որ լինի արդար և հավասար միջավայր:

«Որքանով ես գիտեմ, ակցիայի մասնակիցների պահանջն այն է,որ օրենսդարական փոփոխությունը չբերի առավելություններ մեկ ընկերության համար և անհավասար պայմաններ մյուսների համար: Այսինքն՝ խոսքը արդարության և հավասարության մասին է, ինչին մենք բնականաբար կողմ ենք: Հետևաբար այն լուծումը, որն այս պահին մեծամասնությունը առաջարկում է, վերաբերվում է այն բանին, որ այս պահին արվեն քայլեր, բայց այս ընթացքը՝ մեկ տարի ու կեսը, օգտագործել նրա համար, որ միջոցներ կիրառվեն հավասարապես արգելելու համար: Այսօր հարցը, որը քննարկվում է, քննարկվում է այն համատեքստում, որպեսզի առաջիկա մեկ ու կես տարվա ընթացքում լրջագույն փոփոխություններ արվեն այդ հարցը լուծելու համար: Նախագծում կան դրույթներ, որոնք միանշանակ ընդունելի են: Օրինակ՝ տարիքային ցենզը, այն որ մարդիկ, ովքեր խաղամոլության արդունքում վնաս են պատճառել իրենց ընտաիքին, դատարանի վճռի համաձայն իրենց մուտքը և մասնակցությունը որևէ խաղի արգելվելու է»,- պարզաբանեց պատգամավորը:

Խաչատրյանն ասաց, որ պետք է քննարկվեն նաև նախագծի խնդրահարույց կողմերը: Պատգամավորն  անդրադարձավ նաև այն հարցին, թե ինչու այս նախագիծը միայն մեկ ընկերության դժգոհության պատճառ դարձավ: Նրա տեղեկություններով պատճառն այն է, որ Հայաստանում ամենամեծ ցանցը ունի հենց այդ կազմակերպությունը և ստացվում է, որ ամենաշատը տուժելու է այդ ընկերությունը: 

«Ես կարծում եմ, որ գլխավոր խնդիրը անարդարությունն է: եթե որևէ որոշում բացատրվում է և հասարակությունը հասկանում է դրա նպատակը, և այդ նախագիծը տարածվում է բոլորի վրա, ապա մարդիկ այլ կերպ են ընկալում: Եվ հակառակը. եթե նախագիծը վնասելու է մի ընկերության և ծաղկելու է մյուսը, բնականաբար դա խիստ դժգոհությունների առիթ է դառնում»,- եզրափակեց պատգամավորը: