ԱԺ նիստի օրակարգում է մարտի 1-ի տուժածների փոխհատուցման հարցը. ՈՒՂԻՂ

Ազգային ժողովը շարունակում է իր հերթական նիստերի աշխատանքը: Խորհրդարանի օրակարգում ընդգրված են ռեկորդային թվով հարցեր՝ 41:

Մայիսի 29-ի նիստում խորհրդարանը հավանություն չտվեց ՀՀ նախագահի կողմից Սահմանադրական դատարանի դատավորի պաշտոնում Արթուր Վաղարշյանի թեկնածությանը: Խորհրդարանը դեռ նախորդ տարվա մայիսից չի կարողանում ՍԴ անդամի թափուր տեղը լրացնել: 

Բացի այդ, ԱԺ-ն մերժեց բոլոր այն նախագծերը, որոնք բացասական եզարակացության էին արժանացել կառավարության կողմից:

Նախօրեին ԱԺ-ն քննարկել է ՏՄՊՊՀ եւ ՀԾԿՀ հանձնաժողովների անդամների ընտրության հարցը: Մեսրոպ Մեսրոպյանը, Սեդա Շահինյանը, Սերգեյ Աղինյանը, Կամո Սարգսյանն ընտրվել են ՀՀ հանրային ծառայությունները կարգավորող հանձնաժողովի անդամներ:

Նշենք, որ ԱԺ օրակարգում են մասնավորապես, հետեւյալ հարցերը.

2008 թվականի մարտի 1-ից 2-ը Երեւան քաղաքում տեղի ունեցած իրադարձությունների ժամանակ տուժած անձանց աջակցության մասին,

«2018 թվականի ընթացքում ՀՀ մարդու իրավունքների պաշտպանի գործունեության, մարդու իրավունքների եւ ազատությունների պաշտպանության վիճակի մասին» տարեկան հաղորդում եւ «Հայաստանի Հանրապետության մարդու իրավունքների պաշտպանի՝ որպես կանխարգելման ազգային մեխանիզմի 2018 թվականի գործունեության վերաբերյալ» տարեկան զեկույցը,

ՀՀ կենտրոնական բանկի գործունեության վերաբերյալ տարեկան հաղորդումը:

Նկատենք, որ հաշվի առնելով, որ մայիսի 28-ը ոչ աշխատանքային օր էր, ԱԺ հերթական նիստերը մեկնարկել են մայիսի 29-ին: Քանի որ օրակարգը շատ հագեցած է, ամենայն հավանականությամբ, այս շաբաթվա ընթացքում օրակարգը չի սպառվի եւ ԱԺ նիստերը կշարունակվեն նաեւ հաջորդ շաբաթ: