Վաղն էլ կարող է ասի՝ աչքիս վերևում ունք կա․ Դանիել Իոաննիսյանը՝ Ալեն Սիմոնյանին

«Ե՞ս, ինչի՞ համար, բացարձակապես մտադիր չեմ որևէ մեկից ներողություն  խնդրել և չեմ կարծում, որ «Իրազեկ քաղաքացիների միավորում» փաստերի ստուգման հարթակը պետք է ինչ-որ մեկից ներողություն խնդրի, որովհետև մենք ոչ ոքի չենք զրպարտել»,- այս մասին ԼՈՒՐԵՐ․com—ի հետ զրույցում ասաց «Իրազեկ քաղաքացիների միավորում» ՀԿ-ի նախագահ Դանիել Իոաննիսյանը։

Նշենք, որ ԱԺ փոխնախագահ Ալեն Սիմոնյանը հայտարարել էր, որ Դանիել Իոաննիսյանը պետք է ներողություն խնդրի՝ իր կեղծ տվյալներով հայտարարագիր ներկայացնելու վերաբերյալ հայտարարության համար: 

«Հետաքննությունը, որը հրապարակվել է, եղել է զուտ փաստերի վրա հիմնված, դրանց մեծ մասը հենց Ալեն Սիմոնյանի կողմից լրացված հայտարարագրերն են։ Այնպես որ, եթե ինչ-որ մեկը պետք է ներողություն խնդրի, գուցե՞ դա Ալեն Սիմոնյանն է, որ հայտարարագրերում իրականությանը չհամապատասխանող տվյալներ է գրել։ Մենք ունենք փաստեր, որ ինքը ոչ միայն իրականությանը չհամապատասխանող տվյալներ է գրել իր՝ Բարձրաստիճան պաշտոնատար անձանց էթիկայի հանձնաժողով ներկայացրած հայտարարագրում, այլ նաև՝ աշնանը Կենտրոնական ընտրական հանձնաժողով ներկայացրած հայտարարագրում։ Կարծում եմ, որ սրան քննչական մարմինները ևս պետք է գնահատական տան։ Ինչպես նաև, նա՝ որպես հանրային պաշտոնատար անձ, պետք է ներողություն խնդրի հասարկությունից՝ հայտարարագրերում սխալ տեղեկություններ լրացնելու համար, որը փաստ է։ Թեև ես վստահ եմ, որ դրանք միտումնավոր են սխալ լրացվել, որովհետև ես իրեն չեմ համարում անգրագետ մարդ»,- ասաց նա։ 

Նրա խոսքով՝ Ալեն Սիմոնյանն իրեն մեղադրել է դրսում Հայաստանի վարկանիշը գցելու մեջ․ «2 օր առաջ ասում էր, թե ես սա անում եմ, որովհետև ուզում եմ դրսում Հայաստանի վարկանիշը գցել, ցույց տալ, որ Հայաստանը ժողովրդավարական երկիր չէ: Այսօր ասում է՝  ընտրական օրենսգիրքն եմ սխալ ներկայացրել, վաղը կարող է ասի՝ աչքիս վերևում ունք կա։ Ի տարբերություն իր նախկինում ղեկավարած կազմակերպությունների ու լրատվամիջոցների՝ ես Իրազեկ քաղաքացիների միավորումում ամեն ինչ չէ, որ բացարձակ ղեկավարում եմ ու ամեն ինչ բացարձակ ինձ ենթակա չէ, և երկրորդը՝ քննարկման առարկան իր լրացրած փաստաթղթերն են, որոնք իրար չեն բռնում։ Ես կարող է վատ մարդ եմ կամ հանցագործ եմ, բայց դա ի՞նչ կապ ունի իր ունեցվածքի կամ եկամուտների հայտարարագրերի հետ»,- նշեց Իոաննիսյանը։

Սոնա Հարությունյան