Դատարանը ստացավ Մանվել Գրիգորյանի գրավոր դիմումը
Իրավունք
ԱԺ նախկին պատգամավոր Մանվել Գրիգորյանի գործով դատական նիստն այսօր հետաձգվեց: Դատարանը ստացավ Մանվել Գրիգորյանի վատառողջ լինելու վերաբերյալ փաստաթղթերն ու Մանվել Գրիգորյանի դիմումը: Նիստին ներկա էր ամբաստանյալներից միայն Նազիկ Ամիրյանը:
Հաջորդ դատական նիստը կկայանա հունիսի 11-ին՝ ժամը 12.00-ին:
Մանվել Գրիգորյանի պաշտպան Լևոն Բաղդասարյանը լրագրողների հետ զրույցում նշեց, որ իր պաշտպանյալի կամքին հակառակ քաղաքացիական հիվանդանոցից նրան տեղափոխել են «Դատապարտյալների հիվանդանոց» ՔԿՀ և նրա կյանքին վտանգ է սպառնում։ Փաստաբանն ընդգծեց, որ քաղաքացիական հիվանդանոցում Մանվել Գրիգորյանի ծախսերը հոգում էին հարազատները և պետության վրա բեռ չի եղել:
Ի պատասխան Գրիգորյանի պաշտպանների մեղադրող Վահե Դոլմազյանն ասաց, որ անձը չէ, որ պետք է որոշի, թե որ ՔԿՀ-ում պետք է գտնվի, դրա համար գործող մարմին կա։
Հիշեցնենք՝ Մանվել Գրիգորյանը մեղադրվում է ապօրինի կերպով զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակությունը կազմակերպելու մեջ:
Ըստ մեղադրանքի` Գրիգորյանը կնոջ, որդու և այլ անձանց հետ նախնական համաձայնությամբ, ապօրինի կերպով ձեռք են բերել, փոխադրել և իրենց պատկանող տարածքներում ապօրինի կերպով պահել հրազեն, ռազմամթերք, ակոսափող հրազենի փամփուշտներ, պայթուցիկ նյութեր:
ՈՒՂԻՂ ԵԹԵՐ
Ամենադիտված 
Դերասանուհու որդին հիվանդանոցում մահացել է. որն էր եղել վեճի բուն պատճառը, ինչու էին կրակել նրան
