Հրաժարվե՛ք Ձեր այդ ընկերոջից (տեսանյութ)

Այսօր Ազգային ժողովում ՀՀ ֆինանսների նախարար Ատոմ Ջանջուղազյանը ՀՀ 2018 թվականի պետական բյուջեի կառավարման տարեկան հաշվետվությունը ներկայացնելուց հետո, «Իմ քայլը» խմբակցության պատգամավոր Բաբկեն Թունյանը նշեց, որ  2018 թվականի բյուջեն որոշ մասով չի կատարվել, մանավանդ վարկային ծրագրերով, քանի որ այդտեղ կոռուպցիոն ռիսկեր կային։ Այս մասին, ըստ Բաբկեն Թունյանի, ասել է վարչապետ Նիկոլ Փաշինյանը։ ԱԺ-ում 2018-ի բյուջեի կատարման մասին քննարկման ժամանակ Թունյանն ասաց, որ նույնը կրկնում է ֆինանսների նախարար Ատոմ Ջանջուղազյանը։

Թունյանն այդ կապակցությամբ մի օրինակով բացատրեց։ «Ունեմ 2000 դրամ, և պետք է ընկերոջս խնդրեմ ինձ համար միս առնի։ Բայց մտածում եմ, որ ընկերս կարող է 100 դրամ գողանա վրայից, ի՞նչ անեմ։ Տա՞մ փողը, որ թեկուզ մի քիչ գողանալով ինձ միս տա, թե՞ փողը չտամ, սոված նստեմ»։

Պատգամավորի հարցին ի պատասխան՝ Ջանջուղազյանն ասաց․ «Հրաժարվեք Ձեր այդ ընկերոջից։ Երբ ընկերոջ վրա կասկած կա, պետք է հրաժարվել նրանից՝ անկախ սոված կամ կուշտ մնալուց։ Նույնիսկ եթե չի խաբում, բայց կասկած կա՝ պետք է հրաժարվել այդ ընկերոջից»։

Մանրամասները՝ տեսանյութում։