Ժողովրդի համար պետք է ընկալելի լինի թափանցիկության աստիճանը. ԲՀԿ-ական պատգամավորները՝ Մարտի 1-ի գործի մասին

Այսօր՝ Ազգային ժողովում տեղի ունեցող ճեպազրույցները ընթացքում փոխնախագահ, «Բարգավաճ Հայաստան» խմբակցության անդամ Վահե Էնֆիաջյանն ասաց, որ Մարտի 1-ի դեպքերի հետ կապված քրեական գործը պետք է քննվի թափանցիկ:

«Մարտի 1-ի դեպքերի հետ կապված՝ գտնում ենք, որ գործընթացը պետք է ամբողջությամբ բացահայտվի, մեր ժողովրդի համար ընկալելի պետք է լինի այդ թափանցիկության աստիճանը և պետք է լինեն գնահատականներ»,- ասաց Էնֆիաջյանը՝ արձագանքելով լրագրողի հարցին, թե արդյոք պատգամավորը ենթադրում էր, որ 2008-ի մարտի 1-ի դեպքերի ժամանակ իշխանությունը մարդ է սպանել ու կոծկել:

Իվետա Տոնոյանը հորդորեց չխախտել ձերբակալված անձի՝ 2008-ին ոստիկանության զորքերի շտաբի պետ Գեղամ Պետրոսյանի անմեղության կանխավարկածը. «Սպասենք հետագա զարգացումներին, երբ նրա մեղքը ապացուցված կլինի, այդ մասին հստակ կխոսենք»,-հավելեց Տոնոյանը: Լրագրողը պնդեց հարցը այլ ձևակերպմամբ՝ ի՞նչ էին մտածում պատգամավորներն այդ օրերին:

«Կարծում եմ՝ այդ օրերին բոլորի մոտ այնքան շոկային ու էմոցիոնալ ֆոն է եղել, որ տեղի ունեցած իրադարձություններին գնահատականները բացառապես զգայական հարթության մեջ են եղել և դրանից հետո միայն որոշակի մանրամասներ են հրապարակվել, որոշակի անձանց մեղադրանքներ են ներկայացվել: Հիմա այս գործընթացը նոր փուլ է մտել, ու մենք իսկապես հուսով ենք, որ Մարտի 1-ի գործն իր ամբողջ ծավալով կբացահայտվի ու մեղավորները կկրեն իրենց պատիժը»,-հարցին ի պատասխան ասաց Տոնոյանը:

Ասպրամ Փարսադանյան