Վարչապետի հետ առանձնազրույց եմ ունեցել, որի մասին տեղեկություն չեմ հայտնի․ Օսիպյան

Կան մարդիկ, որոնք փորձում են ինքնահաստատվել և ինքնադրսևորվել, դրանով ցույց տալ, որ իրենք կարող են ամեն ինչ իրենց թույլ տալ Հայաստանի Հանրապետությունում, բայց վստահեցնում եմ ձեզ՝ դա ընդամենը իրենց կարծիքն է։

Այս մասին այսօր՝  հունիսի 6-ին, լրագրողների հետ զրույցում ասաց ՀՀ ոստիկանապետ Վալերի Օսիպյանը՝ արձագանքելով դիտարկմանը, որ ՀՀ վարչապետ Նիկոլ Փաշինյանը կարծես թե դժգոհ է ոստիկանների գործողություններից և որ կան սևազգեստ մարդիկ, ովքեր փորձում են անկարգություններ հաստատել երկրում։ 

«ՀՀ–ում անթույլատրելի եմ համարում բռնության կոչը, իսկ բռնության կոչեր անողները կարժանան օրենքի սահմաններում իրավապահ մարմինների կոշտ արձագանքին»,–նշեց նա։

Այն հարցին, թե կառավարության նիստում ինչ օպերատիվ տվյալներ նկատի ուներ վարչապետը, երբ խոսում էր սևազգեստ խմբերի մասին, այդ խմբերը վախի մթնոլորտ են ցանկանում արդյոք ստեղծել, Օսիպյանն ասաց. «Որևէ վախի մթնոլորտ չկա, որևէ վախենալու պատճառ չկա, մեր քաղաքացիներն ապահովված են, ՀՀ–ն ապահով երկրներից մեկն է, օպերատիվ տղեկությունները հրապարակման ենթակա չեն»։

Հարցին, որ քաղաքական ուժին նկատի ուներ վարչապետը, ոստիկանապետը պարզաբանեց. «Մեզ համար կապ չունի, որ քաղաքական ուժը ուզում է՝ լինի»։

Ի պատասխան դիտարկմանը, թե ոստիկանության գործողությունները թավշյա են, հենց վարչապետն էլ է դժգոհություն հայտնում, Օսիպյանը  հարցրեց.

«Ի՞նչ չի արել ոստիկանությունը, որ դուք կուզենայիք տեսնել։ Ես վարչապետի հետ առանձնազրույց եմ ունեցել, որի մասին տեղեկություն չեմ հայտնի»։