Առյուծներին քնեցրել են ընդմիշտ. կենդանասերները Կենդանաբանականի տնօրենին են մեղադրում (տեսանյութ)

Առյուծները սպանվել են։ Այս մասին այսօր կառավարության դիմաց բողոքի ակցիայի ժամանակ հայտարարեց Ձորաղբյուրում գտնվող «Ջամբո» էկզոտիկ այգու հիմնադիր Արտյոմ Վարդանյանը։ «Պատճառաբանությունը, թե հիվանդ են եղել, տարիքով մեծ են եղել` սուտ է. դրանք 18 տարեկան են եղել, իսկ առյուծներն ապրում են 25֊30 տարի»,֊ ասաց նա՝ նշելով, որ իրավապահ մարմինները կպարզեն, թե որն է եղել կենդանիներին սպանելու պատճառը։

Արտյոմ Վարդանյանը նշեց՝ իր համախոհների հետ պայքարելու է, որպեսզի կասեցվեն այգում տիրող անընդունելի երևույթները։ Նշենք, որ կենդանասերները տևական ժամանակ է ահազանգում են, որ 2016֊ին առյուծներ են սպանվել։

Նրանց խոսքով՝ Երևանի կենդանաբանական այգում շինարարական աշխատանքներ իրականացնելու և առյուծների համար նոր ազատավանդակներ կառուցելու համար անհրաժեշտություն է առաջացել կենդանիների տեղափոխություն այլ կացարան:

Այս առիթով Երևանի կենդանաբանական այգու տնօրեն Ռուբեն Խաչատրյանը ժողով է հրավիրել աշխատակազմի հետ և տեղեկացրել, որ 8 առյուծներին՝ 4 որձին, 4 էգին պետք է որևէ տեղ տեղափոխել, սակայն 3 որձին և տարիքով մեծերին պետք է քնեցնել: Ռուբեն Խաչատրյանը կենդանիների տեղափոխության գործընթացը կազմակերպում է գաղտնի, երեկոյան ժամի, և բոլորը հավատացել են, որ կենդանիները քնեցվում են տեղափոխության համար և տեղ հասնելով` պետք է արթնանան, բայց 7-8 ամիս անց պարզվում է, որ 3 որձ առյուծներին ընդհանրապես չեն արթնացրել: Կենդանասերները պնդում են՝ երբ ազատավանդակների նորոգումը կազմակերպելու համար առյուծներին պետք է ժամանակավոր Ուրցաձոր տեղափոխելու համար քնեցնեին, նրանց քնեցրել են ընդմիշտ։