«Մեր սև հոգսերը, ձեր վարդագույն «բաբոչկաները»

Այնպես ստացվեց, որ ուղիղ մեկ տարի առաջ դեռևս հին Ազգային Ժողովը  քննարկում և հաստատում էր նոր կառավարության առաջին ծրագիրը։ Այս համընկումները գուցե պատահական չեն լինում։ Այսօր կամփոփենք Նիկոլ Փաշինյանի կառավարության մեկ տարվա գործունեությունը։ Այս մասին այսօր՝ հունիսի 7-ին, մամուլի ասուլիսի ժամանակ հայատարարեց ՀՀԿ փոխնախագահ Արմեն Աշոտյանը։ 

«Իրականության մեջ այս կառավարությունը ապացուցում է, որ որևէ աղերս չունի ՀՀ արտաքին և ներքին բազմաթիվ մարտահրավերների հետ։ Այս կառավարությունը համարժեք չէ մեր երկրի առաջ ծառացած խնդիրների հետ և այդ անհամարժեքությունը ոչ միայն դրսևորվում է յուրաքանչյուր շաբաթ, այլ նաև խորացնում է առանց այդ էլ խորացած անվտանգային միջավայրը Հայաստանի և Արցախի շուրջ։ Հաշվի առնելով նաև երեկ արված թևավոր որոշ արտահայտություններ, կարող ենք ասել՝ «մեր սև հոգսերը, ձեր վարդագույն «բաբոչկաները»։ Սա է, կարծեք թե, մեր կառավարության հիմնական բանաձևը, լոզունգը, որով նրանք փորձում են աշխատել»,-ասաց Աշոտյանը։ 

Աշոտյանի խոսքով՝ Նիկոլ Փաշինյանը չի բավարարվում այն սահմանադրական շրջանակներով, որն իրեն տրված է ՀՀ օրենսդրությամբ և նա ուզում է ոչ թե ուժեղ, այլ՝ տոտալ իշխանություն։ 

«Պատահական չէ, որ Ազգային ժողովը գրավելուց հետո, վարչապետ դառնալուց հետո նա պարբերաբար գրոհներ է ձեռնարկում, այսպես կոչված, դիմադրության օջախների վրա։ Այդ շարքը կարող ենք շարունակել՝ սկսելով դատական իշխանությունից, հիշելով ԵՊՀ-ն, հավելելով Աբովյանը։ Նա չի հանդուրժում և չի հանդուրժելու որևէ տեղ, որևէ վայր, որևէ քաղաք կամ հաստատություն, որտեղ բացարձակ իշխանություն  չունի։ Մեր իշխանությունները փորձում են դարձնել տոտալ վերահսկողության երկիր: Երկիր, որտեղ միակ բանը, որ ստացվում է վարչապետի մոտ՝ հանձնարարականներ տալ ուժայիններին՝ որևէ մեկին ցբխելու: Որևէ այլ բան այս կառավարության մոտ չի ստացվում։ Թյուր կարծիք կա, որ Նիկոլ Փաշինյանի ձեռքը կրակն ենք ընկել՝ մենք, Ռոբերտ Քոչարյանը, այնինչ, հեռտևելով, թե ինչպես են  կառավարության անդամները փորձում առաքինաբար դուրս գալ Նիկոլ Փաշինյանի անհաջող, անլուրջ և անզուսպ հայտարարությունների տակից, կարող ենք ասել, որ Նիկոլ Փաշինյանի ձեռքը կրակին ենք ընկել ոչ թե մենք, այլ  կառավարության ներկայիս գիտակից անդամները։ Օրինակ՝ ինձ համար թոփ եռյակը, որոնք Փաշինյանի ձեռքը պատանդ են դարձել՝ Դավիթ Տոնոյանն է, Զոհրաբ Մնացականյանը և Արթուր Վանեցյանը, որոնք ամեն անգամ ստիպված են սվաղելու Նիկոլ Փաշինյանի հերթական  անհաջող հայտարարությունները»,--ասաց Աշոտյանը։