Դավիթ Խաժակյանի՝ հանցագործության մասին հաղորդման հիման վրա ծառայողական քննություն է սկսվել

Երևանի ավագանու «Լույս» խմբակցության ղեկավար Դավիթ Խաժակյանը տեսաձայնագրություն էր հրապարակել՝ նշելով, որ ոստիկանության ծառայողների մասնակցությամբ միջադեպ է տեղի ունեցել իր մերձավորի հետ։ Դեպքի առնչությամբ ՀՀ ոստիկանության հասարակայության հետ կապի և լրատվության վարչությունը հաղորդագրություն է տարածել, որում նշված է, որ  նախքան այդ հրապարակումը՝ միջադեպի վերաբերյալ ահազանգ է ստացվել ոստիկանություն, որի հիման վրա ոստիկանության Երևան քաղաքի վարչությունում արդեն իսկ նշանակվել էր ծառայողական քննություն։

«Այնուհետև Դավիթ Խաժակյանը հեռախոսազրույց է ունեցել ոստիկանության պետ Վալերիյ Օսիպյանի հետ, որը նրան առաջարկել է հաղորդում տալ ոստիկանություն, ինչի հիման վրա էլ ոստիկանության պետի հանձնարարությամբ հիշյալ միջադեպի կապակցությամբ ծառայողական քննություն է սկսվել ոստիկանության ներքին անվտանգության վարչությունում»,- նշված է հաղորդագրության մեջ:

Դավիթ Խաժակյանը «Ֆեյսբուք»-ի ուղիղ եթերում պատմել է, որ հունիսի 7-ի երեկոյան միջադեպ է տեղի ունեցել իր ազգականի հետ։ Դավիթ Խաժակյանի մերձավորներից մեկին ուշ երեկոյան, երբ նա կողպելիս է եղել իր վարձակալած տարածքի դուռը, մոտեցել են երկու հարբած սևազգեստ անձինք և ներկայացել որպես ոստիկանության աշխատակից: Նրան հարցրել են՝ ով է, ինչ է անում այս տարածքում և նշել, որ ցանկանում է թալանել տարածքը, ինչից հետո մերձավորս նրանցից պահանջել է նախ ներկայանալ։ Վերջիններս ներկայացել են որպես ոստիկանության աշխատակիցներ և ներկայացրել իրենց վկայականները: Ոստիկանության այդ աշխատակիցները հարվածելով և քաշքշելով ազգականիս նստեցրել են մեքենայի մեջ և տարել Ոստիկանության բաժին, որտեղ նրանց են միացել ևս մի քանի ոստիկաններ և հարվածներ հասցրել նրան։

Խաժակյանը պնդել է, որ իր ազգականին հարվածած սևազգեստ անձինք եղել են ոստիկաններ, նրանց հասցրած հարվածներից իր ազգականը ստացել է քթի կոտրվածք, ինչը հաստատող բժշկական փաստաթուղթն առկա է։