Բերման ենթարկված Արթուր Դանիելյանը դուրս եկավ ոստիկանության շենքից

Ոստիկանություն բերման ենթարկված «Ադեկվադ» կուսակցության առաջնորդ Արթուր Դանիելյանը դուրս եկավ ոստիկանության շենքից։ Նա նշեց, որ իրեն բերման ենթարկելու պատճառը հունիսի 9-ին ուղիղ եթերում սպառնալիքներ հնչեցնելն էր ՀՀ վարչապետի հասցեին:

«Այսօր վաղ առավոտյան ինձ ուղարկեցին մի հոդված, որն ինձ համար ծանոթ անձնավորության ոճով էր գրված և ինձ ու իմ ընկերներին մեղադրում էին հիբրիդային պատերազմ հրահրելու մեջ։ Մեր նկարն էր օգտագործված՝ վրան ծաղկավոր բաբոչկա ֆոտոշոփ արած։ Հոդվածը կարդալուն պես հասկացա, որ բոլորիս քաջ ծանոթ մի ծաղրածու այսօր հերթական շոուն է կազմակերպելու։ 2 ժամ հետո մեր գրասենյակ եկան, ինձ համար անհայտ դրդապատճառներով բերման ենթարկեցին, բայց չհասկացա, թե ինչու էին ձեռնաշղթա հագցրել, երբ ես չէի դիմադրում։ Ինձ մեղադրում են, որ սպառնացել եմ ծանր մարմնական վնասվածքներ հասցնել քաղաքացի Նիկոլ Փաշինյանին։ Խոսքն այն քաղաքական հայտարարության մասին է, երբ նախորդ օրը ասուլիսի ժամանակ բառացիորեն կրկնել եմ մի արտահայտություն, որը շաբաթներ առաջ Բակո Սահակյանի հասցեին կիրառել էր մի նիկոլապաշտ ակտիվիստ։ Խոսքը գնում է այն սպառնալիքի մասին, որի մեջ ոստիկանությունը որևէ հանցակազմ չէր տեսել նախկինում։ Ջիվան Աբրահամյանն ասել էր, որ հնարավոր է շուտով կոչ անի, որ Բակո Սահակյանի գլուխը քարով ցխեն»,-ասաց Դանիելյանը։ 

Նա նշեց, որ ինքն այդ արտահայտությունն օգտագործել է, քանի որ գիտեր, որ ոստիկանությունը դրա մեջ հանցակազմ չի տեսնում։

Նշենք, որ մայիսի 25-ին ակտիվիստ Ջիվան Աբրահամյանը Ազատության հրապարակում հավաքի ժամանակ հայտարարել էր․ «Էսօր, որ Բակոյենք եկել են ստեղ՝ սա նախազգուշացում է ձեզ, ես առաջինը կլինեմ, որ կոչ կանեմ, որ գնանք գլուխները քարով ցխենք»։ Իսկ Արթուր Դանիելյանը հունիսի 9-ին, ասուլիսի ժամանակ ասել է․ «Շուտով կարող է մենք կոչ անենք, որ Նիկոլ Փաշինյանի գլուխը կարող է քարով ցխենք»։