Եթե բժիշկները չգնան վերապատրաստման՝ բուժհիմնարկը կզրկվի լիցենզիայից. նախարար
ՔաղաքականԱյսօր Ազգային ժողովում շարունակվում են 2018 թվականի բյուջեի կատարողականկ քննարկումները։ Առողջապահության նախարար Արսեն Թորոյանը հանձնաժողովին ներկայացրեց նախարարության կատարած աշխատանքները։ Լրագրողների հետ զրուցում նախարարն անդրադարձավ մի շարք հարցերի, այդ թվում՝ հանրային վայրերում ծխախոտի օգրագործումն արգելող նախագծին։
ԼՈՒՐԵՐ.com-ի հարցին, թե արդյո՞ք նախարարության ծրագրերի ուշադրության կենտրոնում են նաև մարզային բուժհաստատությունները, քանի որ մարզերի բժիշկները երկար տարիներ չեն գնում վերապատրաստման և բուժումն իրականացնում են հին մեթոդներով։
«Մեր ուշադրության կենտրոնում են Հայաստանի բոլոր բուժհաստատությունները, այդ թվում՝ մարզերի։ Վերապատրաստում անցնելու կարգ գոյություն ունի, ըստ որի՝ նրանք պարտավոր են հինգ տարին մեկ անցնել վերապատրաստում։ Եթե չեն անցնում, ապա բուժհիմնարկը կարող է զրկվել լիցենզիայից։ Հիմա նաև գործում է կրեդիտային համակարգ, երբ բժիշկները վերապատրաստվում են և կրեդիտներ են ստանում, այդ մասով աշխատանքները միշտ շարունակվում են, և բոլոր բժիշկները և նաև բուժքույրերը պետք է անցնեն վերապատրաստում։ Մենք մեր կողմից շատ հաճախ կազմակերպում ենք մեր կողմից նախատեսված վերապատրաստման դասընթացներ, օրինակ՝ ինչ- որ հեռավոր մարզի բժիշկների և բուժքույրերի համար՝ մեր միջոցով։ Բայց, ամեն դեպքում, բուժհիմնարկները պարտավոր են դա անել։ Դա արվում է իրենց բժշկական ծառայությունների որակի համար, ոչ թե ինչ- որ բան ստանալու»,- ասաց նախարարը։
Մեր այն դիտարկմանը, որ վարչական շրջանների պոլիկլինիկաների կողմից տրամադրվող պետական պատվեր ստանալու ուղեգրերը տրամադրվում են տնօրենի ցանկությամբ, երբեմն էլ փոքրիկ կաշառքներով, Թորոսյանը պարզաբանեց, թե ինչ եղանակով է վերահսկվում այդ պրոցեսը։
Նախարարի խոսքով՝ ուղեգրերը տրամադրում են պոլիկլինիկաները. «Այդ ուղեգրերը տրվում են պոլիկլինիկաների հանձնաժողովների կողմից՝ համապատասխան որոշակի կրիտերիաների։ Եթե լինում են դեպքեր, որ քաղաքացին չի համապատասխանում այդ կրիտերիաներին, բայց տրվում է՝ նման պարագայում, այդ մարդը,պարզապես, զրկվում է անվճար բուժօգնություն ստանալուց։ Իսկ եթե կան հստակ օրինակներ՝ կարող եք ասել, և մենք կուսումնասիրենք տվյալ դեպքը»,-ասաց նախարարը։
Ասպրամ Փարսադանյան
ՈՒՂԻՂ ԵԹԵՐ
Ամենադիտված 
«Լևոն արքայի» նկատմամբ որպես խափանման միջոց է ընտրվել տնային կալանքը (տեսանյութ)
