Տաքսու վարորդի սպանությունը որևէ առնչություն չունի «Մարտի 1»-ի գործով ընթացող դատավարության հետ. ՔԿ խոսնակ

Այս պահին նախաքննական մարմնի կողմից ձեռք բերված բավարար ապացույցները բացառում են, որ Սարգիս Ավագյանի սպանությունը որևէ առնչություն ունի «Մարտի 1»-ի գործով ընթացող դատավարության ընթացքի հետ: Այս մասին ԼՈՒՐԵՐ.com-ին հայտնեց Քննչական կոմիտեի լրատվության բաժնի պետ Նաիրա Հարությունյանը՝ անդրադառնալով փաստաբան Սեդա Սաֆարանի այն հայտարարությանը, որ չի բացառվում՝ Մարտի 1-ի գործով տուժող Արթուր Ավագյանի հոր սպանությունը կապ ունենա Մարտի 1-ի գործով վերջին ամիսների բացահայտումների հետ:

«Հաշվի առնելով հանրության հետաքրքրությունը «Մարտի 1»-ի գործով ընթացող դատավարության ընթացքի հետ՝ հորդորում եմ խուսափել չճշտված և չստուգված տեղեկատվություն հրապարակելուց, որը կարող է դառնալ շահարկումների առիթ»,- ասաց Հարությունյանը:

Հիշեցնենք, որ հունիսի 10-ին Երևան քաղաքի Էրեբունի վարչական շրջանի տարածքում ծեծելով, ապա նաև դիտավորությամբ դանակի հարվածով տաքսու վարորդի են սպանել: Այսօր փաստաբան Սեդա Սաֆարյանը հայտարարել է, որ տաքսու սպանված վարորդը Սարգիս Ավագյանն է՝ Մարտի 1-ի գործով տուժող Արթուր Ավագյանի հայրը: Սաֆարյանը չի բացառել, որ սպանությունը կապ ունի Մարտի 1-ին գործի հետ:

Ըստ տարածված տեղեկությունների՝ երկու երիտասարդ դաժանաբար սպանել են մի տղամարդու, ով արգելել է նրանց ծխել մեքենայում։ Սպանված տղամարդը վարչական շրջանում տաքսի մեքենա է վարել, երբ հիշյալ երիտասարդները ուշ ժամի իրենց կանանց հետ նստել են տվյալ մեքենան, և ընթացքում որոշել ծխել։ Վարորդը խնդրել է չծխել, ինչից հետո երիտասարդները բավականին ագրեսիվ տոնով սկսել են արձագանքել, թե իրենց չպետք է ասեն ինչ անեն։ Այս ամենից հետո վարորդը հետ է վերադարձել նույն այն տեղը, որտեղից նստել են երիտասարդները, ասելով, որ չի սպասարկելու նրանց։ Այս հանգամանքը ավելի է զայրացրել ընկերներին, ովքեր իրենց կանանց ճանապարհելուց հետո վերադարձել են Էրեբունի վարչական շրջան եւ դարձյալ վեճի բռնվել տաքսու վարորդի հետ։ Երիտասարդները դանակի մի քանի հարված են հասցրել տաքսու վարորդին, ով հիվանդանոցում մահացել է։ Վիճաբանությունը փորձել է կանխել մեկ այլ քաղաքացի, ով ևս դանակի հարվածներ է ստացել։