Այս պահին մեզ համար առաջնայինը մեր հյուրերի առողջությունն է. White Hall by Tsirani

«White Hall by Tsirani» ռեստորանում հունիսի 8-ին տեղի ունեցած հարսանյաց հանդեսից 2 օր անց հյուրերից ոմանց մոտ նկատվել է ինքնազգացողության վատացում` ջերմություն և լուծ: Վարակի կամ թունավորման աղբյուրի\պատճառները հասկանալու նպատակով ձեռնարկվել են բոլոր համապատասխան միջոցառումները:  Այս մասին իր ֆեյսբուքյան էջում գրառում է կատարել MBG Hospitality ռեստորանային ցանցի հիմնադիր և գլխավոր տնօրեն Կարեն Մարգարյանը:

Հրապարակման մեջ մասնավորապես ասվում է.

«Հարգելի ընկերներ,

վստահ եմ՝ շատերդ եք տեղյակ վերջին դեպքերի մասին: «White Hall by Tsirani» ռեստորանում հունիսի 8-ին տեղի ունեցած հարսանյաց հանդեսից 2 օր անց հյուրերից ոմանց մոտ նկատվել է ինքնազգացողության վատացում`ջերմություն և լուծ: 

Հյուրերից չորսը այս պահին բուժում են ստանում «Նորք» ինֆեկցիոն հիվանդանոցում: Հիվանդներից մեկը տեղափոխվել է այլ բուժհաստատություն` Շենգավիթ բ/կ: 

Վարակի կամ թունավորման աղբյուրի\պատճառները հասկանալու նպատակով ձեռնարկվել են բոլոր համապատասխան միջոցառումները. հիվանդներից վերցվել են կենսանմուշներ` լաբորատոր հետազոտություններ անցկացնելու համար, իսկ Սննդամթերքի անվտանգության և որակի հսկողության տեսչության կողմից իրականացվել է ստուգում ռեստորանի խոհանոցում: Անալիզների և փորձաքննության արդյունքները կլինեն հավանաբար վաղը:
Ավելորդ է ասել, որ այս պահին մեզ համար առաջնայինը մեր հյուրերի առողջությունն է:

Մեր աշխատակիցը հարսանյաց հանդեսի մասնակիցների բուժ. հաստատություն դիմելու վերաբերյալ տեղեկատվությունն ստանալու առաջին իսկ պահից կապի մեջ է եղել բուժ.հաստատություն դիմած անձանց հետ, ժամանակ առ ժամանակ այցելում է բուժ. հաստատություն դիմած անձանց՝ վերջիններիս խնդիրները տեղում հասկանալու և անհրաժեշտության դեպքում աջակցելու համար: 

Մեր ընկերությունը պատրաստակամ է աջակցել բուժ. հաստատություն դիմած բոլոր անձանց՝ հոգալու բժշկական զննության և ապաքինման հետ կապված բոլոր ծախսերը անկախ հետազոտության արդյունքներից, անկախ այն փաստից՝ վնասը պատճառվել է ռեստորանի կողմից, թե ոչ:

Շուտափույթ ապաքինում եմ մաղթում և վստահեցնում եմ, որ անձամբ պատրաստ եմ անհրաժեշտ ամեն ինչով աջակցել ձեզ»: