Ի՞նչ է նախագահ Սարգսյանը քննարկում արտախորհրդարանական ուժերի հետ

ՀՀ նախագահ Արմեն Սարգսյանը արդեն տևական ժամանակ է հանդիպումներ է ունենում արտախորհրդարանական կուսակցությունների հետ։ Արդեն հանդիպումներ են եղել ՀՅԴ, «Ժառանգություն», «Հանրապետություն», «Մեկ Հայաստան» կուսակցությունների ներկայացուցիչների հետ։

Նախագահի անունից հրավեր է ստացել նաև ԱԻՄ-ի նախագահ Պարույր Հայրիկյանը։ Հայրիկյանն իր ֆեյսբուքյան էջում տեղեկացնելով հանդիպման հրավերի մասին՝ նաև գրել էր. «հետաքրքրական է, թե «նախահեղափոխական եւ հետհեղափոխական» ի պաշտոնե ապաքաղաքական նախագահը ինչ ունի խոսելու քաղաքական կուսակցությունների ղեկավարների հետ։ Երբ պատասխանն իմանամ, նաև այդ կարձանագրեմ»։

«Մեկ Հայաստան» կուսակցության վարչության անդամ Վահե Դավթյանի խոսքերով նախագահի հետ հանդիպմանը քննարկել են ինստիտուցիոնալ և անվտանգային զարգացման խնդիրները։ Օրակարգում մի շարք հարցեր էին ներառված, մասնավորապես, խոսել են Հայաստանում քաղաքական մշակույթի ձևավորման և զարգացման խնդիրների մասին։ Նաև ոլորտային քննարկումներ են տեղի ունեցել։ «Մասնավորապես, հանդիպմանը ներկայացել էին քաղխորհրդի այն անդամները, որոնք կուսակցության շրջանակներում ոլորտային համակարգողներ են։ Մենք խոսել ենք Հայաստանի էներգետիկ, մշակութային անվտանգության, տնտեսական նշանակություն ունեցող խնդիրների մասին։ Հանդիպման շրջանակներում մենք փորձել ենք հասկանալ, թե ինչպիսին պետք է լինի «Մեկ Հայաստան» կուսակցության դիսլոկացիան ընդհանուր քաղաքական դաշտում և ստանալ նախագահի՝ որպես Սահմանադրական երաշխավորողի, ըստ էության՝ քաղաքական կուլտուրա կերտողների առանցքային մեկի գնահատականը։ Դրա վերաբերյալ նախագահը ներկայացրեց իր տեսլականները երկրի շարունակական զարգացման հարցում, նշեց յուրաքանյուրիս իրենց պատասխանատու ոլորտների զարգացման շուրջ։ Նախագահը բավական բաց անձնավորություն է, ով խնդիրները և դրանց լուծումները տեսնում է խորքային մակարդակում»,-ասաց Դավթյանը։

«Հանրապետություն» կուսակցության անդամ, Երևանի քաղաքապետարանի ավագանու «Լույս» խմբակցության անդամ Թեհմինա Վարդանյանի խոսքերով, հանդիպման ընթացքում քննարկվել են ներքաղաքական և ատաքին քաղաքական խնդիրների հետ կապված հարցեր։ «Որևէ հիմնական շեշտ չկար։ Չափազանց անմիջական, հաճելի պարտավորեցնող հանդիպում էր։ նախագահն իմ հանդիպած ամենաբարձր մակարդակի քաղաքական գործիչ էր։ Մեր ունեցած դիալոգը ամենաերկարն էր» ,-ասաց Վարդանյանն՝ ընդգծելով, որ կուսակցության հետ հանդիպումը ճանաչողական էր։

Հատկանշական է, որ նախագահը երկրի համար ռազմավարական հարցերի շուրջ քննարկումներ է ունենում հատկապես արտախորհրդարանական ուժերի հետ։ Կա տեսակետ, որ Սարգսյանը հենց արտախորհրդարանական ուժերի հետ է հանդիպում, քանի որ օրինակ խորհրդարանական ուժերի՝ հատկապես խորհրդարանական մեծամասնության հետ շփումներ առանց այն էլ ունենում է։ Սակայն «Իմ քայլի» ու հատկապես Նիկոլ Փաշինյանի հետ հարաբերությունների մակարդակը իդեալական կամ բարիդրացիական որակվելուց բավական հեռու է։ Ավելին. նախագահն այդ հանդիպումնները նախաձեռնեց «Քաղաքացիական պայմանագիր» կուսակցության լիդերների հետ առերևույթ լարվածության ֆոնին։ Թե որքանով է հիմնավոր, որ նախագահը փորձում է քաղաքական հենարան գտնել, ցույց կտա ժամանակը։