Ողբամ մեր բոլորիս վիճակը

«Ժողովրդի կենսամակարդակը ավելացել ա՞, ո՞ւմ կյանքն ա լավացել՝ բացի իր նեղ շրջապատից: Կարող ա մի քանի հոգի ուղղաթիռ են նստում, խորոված-քյաբաբը շատացել ա, գաթան, բուլկին, էդ էքսպոները մեր ժամանակ ավելի լավ էին կազմակերպում, ես անցյալին վերադառնալու կոչ չեմ անում, միշտ առաջ եմ նայում, բայց համեմատության մեջ, այո՛, այսօր Նիկոլ Փաշինյանը բոլոր ոլորտներում պարտվում է անցյալի բոլոր իշխանություններին»: Այս մասին այսօր հրավիրված մամուլի ասուլիսին հայտարարեց Էդուարդ Շարմազանովը:

Խոսելով օրերս վարչապետի արած հայտարարության մասին, թե իրենց կառավարությունը փայլուն է աշխատել, Շարմազանովն այն ցինիկ որակեց:

«Ա՛յ ընկեր ջան, թույլ տուր հասարակությունը քո գնահատականը տա: Քո տված խոստումները նայե՞մ, թե՞ քո գրանցած արդյունքները նայեմ: Եթե դա է փայլուն, ուրեմն՝ ողբամ մեր բոլորիս վիճակը: Հայտնի կենդանու համառությունը ամեն տեղ չի, որ օգուտ է բերում, մանավանդ՝ քաղաքականության մեջ»,-ասաց նա: 

Պատասխանելով լրագրողի հարցին, թե աղերսներ տեսնո՞ւմ է արդյոք այնտեղ, որ Սահմանադրական դատարանի ներկայիս իրավիճակի մասով տարբեր հարթակներում խոսում են, որ այն որոշ առումով կապված է Ռոբերտ Քոչարյանի գործը Սահմանադրական դատարան ուղարկելու հետ, Շարմազանովը հայտարարեց, որ աղերսներ տեսնում է և հայտնեց, որ Փաշինյանի ցանկացած ներքաղաքական գործունեության մեջ կա Փաշինյանի անձնական դիրքորոշումն ու վրեժխնդրությունը: 

«Ինքը դատարանները արգելափակելու որոշում կայացրեց, երբ Ռոբերտ Քոչարյանն ազատ արձակվեց, Արցախի իշխանությունների նկատմամբ սուր հայտարարություններ արեց, երբ Սերժ Սարգսյանը Արցախում էր»,-նշեց նա ու հավելեց, որ Փաշինյանի հետ անձնական խնդիր չունի, իր քննադատության հիմքում երևույթն է: