Լույս է տեսել «Գիտական Արցախ» պարբերականի 2019 թվականի 1-ին համարը․ քննարկում ԵՊՀ-ում (տեսանյութ, լուսանկարներ)

Այսօր` հունիսի 25-ին, ԵՊՀ Պալեանների անվան դահլիճում տեղի ունեցավ «Արցախի երիտասարդ գիտնականների և մասնագետների միավորում» (ԱԵԳՄՄ) հասարակական կազմակերպության «Գիտական Արցախ» պարբերականի խմբագրական խորհրդի անդամների ու հոդվածագիրների հետ հանդիպում-քննարկում, որի ժամանակ մասնակիցներին տրվեցին պարբերականի՝ իրենց օրինակները։

Միջոցառմանը ներկա էին ինչպես խմբագրական խորհրդի անդամներ, այնպես էլ հոդվածագիրներ, ասպիրանտներ, դասախոսներ, որոնք հայտնեցին իրենց դրական տպավորությունները, ինչպես նաև հանդես եկան առաջարկություններով՝ հետագայում պարբերականն ավելի կատարելագործելու նպատակով։ Բանախոսները, կարևորելով պարբերականի դերը՝ հույս հայտնեցին, որ այն կդառնա գիտական դիվանագիտության այն հարթակը, որն իր մեծ լուման կունենա Արցախի միջազգային ճանաչման գործում։

Մեզ հետ զրույցում «Արցախի երիտասարդ գիտնականների և մասնագետների միավորում» ՀԿ-ի հիմնադիր Ավետիք Հարությունյանը նշեց, որ «Գիտական Արցախ»-ի 2019 թ.-ի առաջին համարում տեղ են գտել 7 երկրներ ներկայացնող 50 գիտնականների աշխատանքներ․ «Այդ երկրներն են՝ Հայաստան, Արցախ, Բելառուս, Իրան, Լեհաստան, Ռուսաստան և Շվեյցարիա։ Մեր հիմնական նպատակներից առաջինը՝ գիտական արդյունք, որակ ապահովելն է, դրան զուգահեռ գիտական դիվանագիտության զարգացումը, ինչը մեր կազմակերպության կարևորագույն առաքելություններից մեկն է, քանի որ, ցավոք, օտարերկրացիների մոտ Արցախ կամ Ղարաբաղ ասելով՝ շատ հաճախ ասոցացնում են հակամարտության հետ։ Մեր խնդիրն է, որպեսզի կոտրենք այդ կարծրատիպը և Արցախ ասելով հասկանան հայկական հող, հանրապետություն, որտեղ մարդիկ ստեղծում են, արարում են»,- ասաց նա:

Ի դեպ, նշենք, որ «Գիտական Արցախ»-ը ՀՀ ԲՈԿ-ի ընդունելի հանդեսների ցանկում ընդգրկված՝ առայժմ միակ արցախյան պարբերականն է: Այն ստեղծվել է Արցախի երիտասարդ գիտնականների և մասնագետների միավորման նախաձեռնությամբ, նպատակն է երիտասարդ, սկսնակ հետազոտողներին հնարավորություն տալ իրենց աշխատանքները տպագրելու։

Սոնա Հարությունյան