Չեմ բացառում, որ պարոն Քոչարյանը կամովին ներկայանա կալանավայր․ փաստաբան

Քիչ առաջ Վերաքննիչ քրեական դատարանի դատավոր Արմեն Դարբինյանը փոփոխեց առաջին ատյանի դատարանի՝ մայիսի 18-ի որոշումը և 2-րդ նախագահ Ռոբերտ Քոչարյանի նկատմամբ խափանման միջոց ընտրվեց կալանավորումը։

«Այս պահին չենք ուզում մեկնաբանել, մեր կարծիքը վաղուց հայտնի է թե՛ դատավորի, թե նրա կայացրած հնարավոր բոլոր դատական ակտերի վերաբերյալ։ Ավելի մանրամասն մեկնաբանություններ հետագայում կներկայացնենք»,- այս մասին ԼՈՒՐԵՐ․com-ի հետ զրույցում ասաց Քոչարյանի փաստաբան Հայկ Ալումյանը։ 

Հարցին՝ արդյոք սպասելի՞ էր իր պաշտպանյալի նկատմամբ դատարանի կայացրած այսօրվա որոշումը, փաստաբանը պատասխանեց․ «Երբ խոսքը գնում է տվյալ դատավորի մասին բոլոր հնարավոր որոշումներից անպայման առավել հավանական որոշումը, որ նա կարող է կայացնել` այն է, որն առավել շատ հակասում է օրենքին։ Դա ավանդույթ է, և տվյալ դատավորը ձգտում է կայացնել որոշում, որն առավել հեռու է գործող օրենքներից»,- նշեց նա։

«Հստակ չեմ կարող ասել, բայց անկախ մեր վերաբերմունքից դատարանի որոշմանը, իհարկե գործընթացը կկատարվի։ Օրենքը ինչպես նախատեսում է` այդպես էլ կլինի։ Չեմ բացառում, որ պարոն Քոչարյանն ինքը՝ կամովին ներկայանա կալանավայր»,-ասաց Հայկ Ալումյանը։ 

Սոնա Հարությունյան