Բոգոն բերման է ենթարկվել

Քիչ առաջ Կենտրոնական (Կիլիկիա) ավտոկայանից բերման է ենթարկվել «ավտոկայանի նայող», քրեական հեղինակություն Բոգո մականունով հայտնի Ռուբեն Կոստանյանը (Սիմոնյան ազգանունը փոխել է): ԼՈՒՐԵՐ․com—ի հետ զրույցում ՀՀ ոստիկանությունից հաստատեցին այս տեղեկությունը:

Հարցին՝ ի՞նչն է բերման ենթարկելու պատճառը, ոստիկանությունից փոխանցեցին, որ այլ ինֆորմացիա չեն կարող հաղորդել։

Նշենք, որ Բոգոն ԱԺ ՀՀԿ-ական նախկին պատգամավոր, գործարար Սամվել Ալեքսանյանի մտերիմն է, ինչպես նաև գործարար Արկադի Համբարձումյանի (Դերժավայի Արկադի) խնամին:

Հիշեցնենք, որ մարտ ամսին ոստիկանության 6-րդ վարչության դիմակավորված աշխատակիցները «Կիլիկիա» ավտոկայանում հատուկ գործողություններ էին իրականացնում և մի շարք ապօրինություններ էր բացահայտվել, նա սեփական սենյակն ու հյուրանոցն էր կառուցել ավտոկայանի շենքում։ Բոգոյի անունը կապվում էր նաև ամիսներ առաջ «Կիլիկիա» ավտոկայանի տնօրեն նշանակված Ռոման Համբարձումյանի մեքենան վառելու հետ։

Երևան-Արմավիր երթուղին սպասարկող «Գալակտիկա տրանս սերվիս» ՍՊԸ-ի տնօրեն Շուշանիկ Խաչատրյանն էլ բազմիցս հայտարարել է, որ Բոգոյին պատկանող մեքենաներն ապօրինաբար ուղևորափոխադրումներ են իրականացնում՝ խոչընդոտելով իր ընկերության գործունեությանը։

ԼՈւՐԵՐ.com-ի աղբյուրները փոխանցել էին՝ Բոգոն իշխանափոխությունից հետո «շատ լարված է, հետը խոսել չի լինում»: Կան խոսակցություններ, որ նոր իշխանությունները մեծ ուշադրությամբ հետևում են Բոգոյի գործունեությանը և առանձին անձինք անգամ աչք են դրել ունեցվածքի վրա՝ Բոգոյին ասելով՝ բեր առանց աղմուկի մեզ հետ կիսվիր: