Խնդրում էր՝ իրեն բաց թողնենք․ Գագիկ Եղիազարյանը՝ սպանված ավագ ենթասպա Գագիկ Մկրտչյանի մասին

«Սասնա Ծռեր-1» գործով դատական նիստին գործով մեղադրյալ Գագիկ Եղիազարյանն, անդրադառնալով Գագիկ Մկրտչյանի հրազենային վիրավորմանը, նշեց, որ վիրավորում ստանալու հանգամանքներին ծանոթ չէ, նրան միայն տեսել է հսկիչ անցագրային կետի հարևանությամբ՝ ձեռքը փաթաթած, խնդրում էր իրեն ազատ թողնել․ «Ես հարցրի՝ ինչ խնդիր ունի, գուցե շտապօգնություն կանչենք, ասաց՝ ոչ, կարող է ինքնուրույն գնալ։ Ասեցի՝ ընկերներով կզրուցենք և այդ մասին կարծիք կհայտնենք։ Հետո իմացա՝ արդեն գնացել է»,- ասաց Եղիազարյանը։

Նախագահող դատավոր Մեսրոպ Մակյանի այն հարցին՝ արդյոք Գագիկ Մկրտչյանի մահվան հանգամանքների վերաբերյալ իր ընկերներից որևէ բան իմացե՞լ է, թե ոչ՝ Եղիազարյանը նշեց, որ փաստացի տեսել է, որ Մկրտչյանը վիրավոր է ձեռքից և միայն կալանավայրում հեռուստատեսությամբ է իմացել, որ նա գիտակցության չգալով, մահացել է։

Հիշեցնենք, որ «Սասնա Ծռերի» անդամները մեղադրվում են 2016 թ. հուլիսի 17-ին զանգվածային անկարգություններ կազմակերպելու նախապատրաստության, ծանրացուցիչ հանգամանքներում սպանությունների, շենքեր, շինություններ, տրանսպորտի միջոցներ զավթելու, պատանդ վերցնելու եւ պահելու, ապօրինի կերպով հրազեն, ռազմամթերք ձեռք բերելու, պահելու, փոխադրելու, զենք, ռազմամթերք հափշտակելու, ուրիշի գույքը գաղտնի հափշտակելու եւ դիտավորությամբ ոչնչացնելու մեջ։

Զինված հարձակման հետևանքով զոհվեցին գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը։