Մարտի 1-ի զոհերի հարազատներն ընդդեմ Սամվել Նիկոյանի եւ Վահագն Հարությունյանի

Վերջին լուրեր 30 Նոյեմբեր, 2011 13:37

2008-ի մարտիմեկյան իրադարձություններում զոհվածների հարազատները մտահոգված են, որ մարտի 1-ը չբացահայտած պաշտոնյաները ավելի բարձր պաշտոններ են ստանում: Այս առիթով զոհերի ծնողները իրենց մտահոգությունները հայտնել են Եվրոպայի խորհրդի Մարդու իրավունքների հանձնակատար Թոմաս Համարբերգին, ԵԽ Խորհրդարանական վեհաժողովի Հայաստանի հարցով համազեկուցողներ Աքսել Ֆիշերին եւ Ջոն Պրեսկոտին ուղղված բողոք-նամակում: Նամակը նրանք արդեն հանձնել են Վեհաժողովի երեւանյան գրասենյակ:

Զոհվածների հարազատներին, մասնավորապես, զայրացրել է Մարտիմեկյան իրադարձությունների ուսումնասիրման խորհրդարանական նախկին ժամանակավոր հանձնաժողովի նախագահ, ԱԺ-ի փոխնախագահ Սամվել Նիկոյանի` ԱԺ-ի նախագահի պաշտոնում նշանակման մասին կանխատեսումները, ինչպես նաեւ Մարտի 1-ի գործով քննչական խմբի արդեն նախկին ղեկավար Վահագն Հարությունյանի նշանակումը ոստիկանության Քննչական գլխավոր վարչության Հատկապես կարեւոր գործերի քննության վարչության պետի պաշտոնում: Զոհվածների հարազատները գտնում են, որ Վահագն Հարությունյանը, որը ոչինչ չէր արել 3.5 տարվա մեջ սպանությունները բացահայտելու համար, պետք է ոչ թե պաշտոն ստանար, այլ պաշտոնից զրկվեր: Նիկոյանը նույնպես: Մարտի 1-ի զոհերի հարազատները ձեւական են համարում նաեւ եվրոպական ատյաններում տված Հայաստանի իշխանությունների խոստումներն ու վստահեցումները, թե արդար դատաքննություն պետք է անցկացվի, մեղավորներն էլ պետք է բացահայտվեն եւ պատժվեն: Նրանք կարծիքով, խոստումներից ոչ մեկը չի իրականացել: