Սորոսի հիմնադրամը ստացել է կանաչ լույս. Ավինյանը հեռու չէ այդ շրջանակներից. կարծիք

Երեկ հայտնի դարձավ, որ ՀՀ փոխվարչապետ Տիգրան Ավինյանի N 86-Ա որոշմամբ, Սորոսի գրասենյակից ֆինանսավորվող որոշ կազմակերպություններ համարվել են «բարեգործական», ազատվել հարկերից: Թե ինչու է այդպես եղել և ինչն է միավորում այդ կազմակերպություներին, ԼՈՒՐԵՐ.com-ի թղթակիցը փորձեց պարզել «Լույս» տեղեկատվական-վերլուծական կենտրոնի ղեկավար Հայկ Այվազյանից: 

«Այդ կազմակերպություները, բացի իրենց հիմնական գործառույթից, իրականացնում են այլ աշխատանքներ, այսինքն՝ հայտարարում են, որ զբաղվում են կոնկրետ հարցերի կարգավորմամբ, բայց դրան զուգահեռ, կատարում այլ աշխատանքներ: Օրինակ 2016թ. ՊՊԾ գնդի գրավումից հետո, չգիտես ինչու, ԼԳԲՏ հարցերով զբաղվող կազմակերպությունները, նաև կանանց իրավունքներով զբաղվող կազմակերպությունները սկսեցին ցույցերին մասնակցել, նույնիսկ թռուցիկներ էին բաժանում, թե բախումների ժամանակ ինչպես է պետք պաշտպանվել ոստիկաններից»,- ասաց նա:

Այվազյանի խոսքով՝ սա վկայում է, որ նրանք իրականացնում են գործառույթներ, որոնք դուրս են իրենց կանոնադրությունից: Հետևաբար, այդ կազմակերպություններն առերևույթ ինչ-որ նպատակներ հայտարարելով, իրականում, երկրի համար կարևորագույն պահերին սկսում են զբաղվել ներքաղաքական գործունեությամբ, հատկապես՝ ներքաղաքական իրավիճակի ապակայունացմամբ:

«Իսկ այդ կազմակերպություների ամենօրյա աշխատանքը, օրինակ՝ կանանց իրավունքների պաշտպանությունը, քող է: Ընդ որում, կանանց իրավունքների պաշտպանությունն էլ ուղղված չէ հենց դրան, այլ՝ ընտանիք ինստիտուտի կազմաքանդմանը: Այսինքն՝ իրենց հայտարարվող բուն նպատակներով և′ ընտանիք ինստիտուտի դեմ են աշխատում, և′, ըստ անհրաժեշտության, իրենց լծակները օգտագործում են, որպես ներքաղաքական գործիքներ»,- ընդգծեց նա:

Այվազյանը շեշտեց, որ քանի դեռ այդ կազմակերպությունների ամենօրյա գործունեությունը, աշխատողների աշխատավարձը, գործուղումները, գրասենյակի վարձակալությունը և այլ ծախսերը կախված է Սորոսի գրասենյակի ֆինանասավորումից,  իրենք կատարում են այն օրակարգը, որ թելադրում են իրենց. «Սորոսի հիմնադրամը  օտարերկրյա ռեզիդենտ կառույց է, որը սպասարկում է ԱՄՆ շահերը»:

Դիտարկմանը, թե ինչու է Ավինյանը հարկերից ազատել հենց այդ կազմակերպություներին՝ Այվազյանը պատասխանեց. «2018 թվականի գունավոր հեղափոխությունից հետո, Սորոսի հիմնադրամը ստացել է կանաչ լույս՝ գրավելու ու իր վերահսկողության տակ վերցնելու ՀՀ պետական կառույցները: Տիգրան Ավինյանն էլ հեռու չէ այդ շրջանակներից»: