«Կեղծիքներով հասել են ունեցվածքի». ամերիկահայ գործարարի մեկուկես մլն դոլար արժողության ընկերությունը վաճառվել է 25 000 դրամով (տեսանյութեր)

Հայաստանի արդյունաբերողների և գործարարների միության խորհրդի անդամ, «R & V komfort» ՍՊԸ նախագահ Ռուբեն Շահմուրադյանը յուրացրել է ամերիկահայ գործարարի ունեցվածքը՝ բիզնես հանդիսացող սեփականությունը: Այս մասին հրավիրված ասուլիսին հայտարարեց ամերիկահայ գործարար Հրանդ Հարթունին:

Նրա խոսքով՝ երբ 2005 թվականին վերադարձել է Հայաստան պարզել է, որ Հայաստանի արդյունաբերողների և գործարարների միության խորհրդի անդամ Ռուբեն Շահմուրադյանը, ում հետ համագործակցել և R&H հայ-իրանական ընկերությունն է ստեղծել (զբաղվել է շինանյութի ներկրմամբ, հետագայում անվանափոխվել է և դարձել R&V կոմֆորտ), գույքը կեղծ ստորագրությամբ և անվան սխալ ձևակերպմամբ իր որդուն է վաճառել կոպեկներով: Հրանդ Հարթունու անունը առուվաճառքի փաստաթղթում գրվել է Հարությունի, իսկ գործարքը կնքվել է այն ժամանակ, երբ Հարթունին բուժման նպատակով եղել է ԱՄՆ-ում, ինչն ապացուցող բազմաթիվ փաստաթղթեր ունի գործարարը։ 

ԼՈՒՐԵՐ.com-ի հարցին՝ ընդհանուր առմամբ, որքա՞ն վնաս է հասցվել ամերիկահայ գործարարին, Հարթունին պատասխանեց. «Խոսքը մոտ 1 մլն դոլարի արժողության ընկերության մասին է, որը Շահմուրադյանը նվիրատվություն է  արել կնոջ, ապա իրենց ընտանիքի անդամների անուններով, իսկ 500 հազար դոլարի գույքը Շահմուրադյանն, ընդամենը, 25 000 դրամով վաճառել է որդուն՝ Վարդան Շահմուրադյանին»,- ասաց գործարարը:

Նա նշեց՝ դատական համակարգի կոռումպացվածության պատճառով տարիներ առաջ չեն կարողացել հասնել արդարության, ուստի վարչապետի հայտարարություններից հետո Հրանդ Հարթունին վերադարձել է Հայաստան փորձելով վերականգնել արդարությունը և սեփականության իրավունքը, սակայն ինչպես ինքն է ասում՝ հիմա էլ խնդիրը լուծում չի ստանում:

Փաստաբան Մնացական Ղազարյանը ներկայացրեց փաստաթղթերը՝ մատնացույց անելով կատարված կեղծիքները։

Սոնա Հարությունյան