Մեր բանակը շարունակում է հզորանալ, վերջին ժամանակներում ձեռք են բերվել լրջագույնս զինատեսակներ. Վաղարշակ Հարությունյան

Այսօր տոնում ենք հաղթանակած բանակի օրը, որն իրականացրեց հայ ժողովրդի երազանքը եւ 600 տարի անց ապահովեց հաղթանակ. Մենք առաջին անգամ կարողացել ենք տարածքներ ազատագրել: Այս մասին այսօր՝ հունվարի 28-ին, «Եռաբլուր» պանթեոնում լրագրողների հետ զրույցում նշեց պաշտպանության նախկին նախարար Վաղարշակ Հարությունյանը:

Նրա խոսքով, այսօր հայոց բանակի մարտունակությունը կանխում է պատերազմը եւ եթե Ադրբեջանը չի փորձում հարձակվել, դա բանակի մարտունակության շնորհիվ է:

«Վերջին ժամանակահատվածում նոր զենքեր են ձեռք բերվել հակաօդային պաշտպանության, ռադիոէլեկտրոնային պայքարի, ինչը մեր բանակի մարտունակությունը բարձրացրել է:

Ամենակարեւոր խնդիրն այն է, որ այսօր նույնիսկ շփման գծում զինադադարի խախտման դեպքերը կրճատվել են: Դա ուղղակի կապված է  մեր բանակի մարտունակության հետ: Զինադադարից ի վեր մեր բանակը հզորացել է եւ հզորանալու է: Այսօր պետության ամենակարեւոր խնդիրն է ապահովել ռազմաքաղաքական բալանսը»-ասաց նա:

Դիտարկմանը, որ ընդդիմությունը թերահավատորեն է նայում նոր իշխանությունների քայլերին՝ կապված երկրի պաշտպանության հետ, նա ասաց. «Մենք հստակ տեսնում ենք, որ մեկ տարվա ընթացքում բանակի բյուջեն ավելացել է 28 տոկոսով, ձեռք են բերվել լրջագույնս զինատեսակներ, օրինակ հակաօդային պաշտպանության ՏՈՌ համակարգեր, դա հստակ թույլ չի տալիս, որպեսզի Ադրբեջանի օդուժը կարողանա գործել արդյունավետ հիմա եւ պատերազմի ընթացքում:

Բանակի հզորությունը կապված է նաեւ ֆինանսավորման հետ, եւ մենք տեսնում ենք, որ այստեղ աճ կա: Բացի դրանից, դուք տեսնում եք, որ փող է հատկացվել, որ մարտական ծառայություն իրականացնող զորամասերում բարելավենք կենցաղային պայմանները: Սպաների աշխատավարձն է բարձրացել»:

Վաղարշակ Հարությունյանը վստահություն հայտնեց, որ հայոց բանակն այսօր մարտունակ է եւ շարունակում է մարտունակ լինել: